Korrupsiyaga qarshi kurashish agentligiga kelib tushgan murojaat asosida Buxoro muhandislik-texnologiya institutida korrupsiyani keltirib chiqarayotgan omillar, unga sabab bo‘layotgan shart-sharoitlar, mablag‘lardan foydalanish va davlat xaridlarini amalga oshirishda qonunchilikka rioya etilishi ahvoli o‘rganildi. Bu haqda agentlik matbuot xizmati xabar berdi.
O‘rganishda institutning moliyaviy hujjatlari qonunchilikka zidligi, to‘lovlar to‘g‘ri hisoblanmasligi, budjet va budjetdan tashqari mablag‘larning noqonuniy sarflanishi, ish haqi, stipendiya va boshqa to‘lovlarning noto‘g‘ri to‘langani hamda davlat xaridlari va mehnat qonunchiligi talablariga rioya qilinmayotgani kabi qator qonunbuzilishi holatlari aniqlangan.
Xususan, davlat xaridlari bo‘yicha institutning 2-korpusi fasad qismini kapital ta’mirlash bo‘yicha e’lon berilmasdan, tanlovlarsiz 1,4 milliard so‘mlik qurilish ishlari to‘g‘ridan to‘g‘ri “Fast Quality Building” MCHJga shartnomasiz berib yuborilgan. Ushbu tashkilot Sog‘lomlashtirish markazida 303,9 million so‘mlik noqonuniy qurilish ishlarini amalga oshirgan.
Shuningdek, institut 1-binosining 5-qavatida “Vobkent San-tex stop montaj servis ” MCHJ tomonidan amalga oshirilgan 2,4 milliard so‘mlik qurilish ishlari yakunlangan. Biroq tugallangan ishlar komissiya tomonidan qabul qilinmagan va uning kafolat muddati tugamagan bo‘lsada, pudratchiga 91,5 million so‘m mablag‘ oldindan to‘lab berilgan.
Mablag‘larning ortiqcha sarflanishi bo‘yicha:
- Mas’ullar tomonidan 18 nafar magistrant va 7 nafar talabaning imtihonda olgan “4” baholari qaydnomalarga ko‘chirilishida “5” bahoga o‘zgartirilgani natijasida 14,7 million so‘mdan ziyod stipendiyalar ortiqcha to‘langani aniqlangan;
- Assistent-o‘qituvchilarga 71 ta holatda katta o‘qituvchi lavozimiga belgilangan jami 50,5 million so‘mlik ortiqcha ish haqi to‘langan.
0,50 hissa tashqi o‘rindoshlik asosida ishlovchi kafedra professori X.Kamilova tekshiruv kuniga qadar ishga kelmagan bo‘lsada, unga yanvar oyida 4,3 million so‘mlik ish haqi hisoblanib, majburiy ushlanmalar saqlangan holda 3,7 million so‘m to‘lab berilgan. Shuningdek, 0,50 hissa professor lavozimida ishlovchi R.Gulyayev o‘quv yili yuklama jadvalida qayd etilmagan bo‘lsa ham, unga tabel to‘ldirilib, 2021-yil sentabr oyidan 2022-yil fevral oyiga qadar 18,3 million so‘m ish haqi hisoblangan, majburiy saqlanmalar ushlangandan so‘ng 15,9 million so‘m ish haqi to‘langan.
Tashqi o‘rindoshlik asosida ishlovchi sirtqi bo‘lim uslubchisi Umida Sharipova hamda Toshkent to‘qimachilik va yengil sanoat instituti xodimi Anvar Jo‘rayevlarning asosiy ish joyidan ma’lumotnoma olinmagan. Dilorom Ergasheva bandlikka ko‘maklashish markazi yo‘llanmasisiz dispetcher lavozimiga qabul qilingan. Dotsent lavozimiga ishlovchi Institutning akademik litseyi direktori Eminjon Halimov asosiy ish joyida 126,6 soat ishda bo‘lmagan.
Qarindosh-urug‘chilik aloqalari borasida manfaatlar to‘qnashuviga yo‘l qo‘yilgani bo‘yicha:
- “Mashinasozlik texnologiyasi” kafedrasi mudiri Nasrullo O‘rinovning qo‘l ostida uning turmush o‘rtog‘i Muhabbat Saidova katta o‘qituvchi, akasi Abdullo O‘rinovning o‘g‘li Uyg‘un O‘rinov dotsent lavozimida, shuningdek, “Menejment” kafedrasi mudiri Sherbek Xayitovning qo‘l ostida turmush o‘rtog‘i Shahlo Primova va singlisi Iroda Xayitovalar o‘qituvchi-stajyor lavozimida ishlayotganligi ma’lum bo‘lgan;
- Bundan tashqari, institutdagi 34 nafar tyutorlarning 20 nafari yoshlar bilan ishlashda yetarli tajriba orttirmagan hamda yetarli pedagogik stajga ega emas. 29 nafar xodim katta o‘qituvchi lavozimiga noqonuniy qabul qilingan.
- Davlat test markazining xulosasiga ko‘ra, 67 nafar abituriyentning tabaqalashtirilgan to‘lov-kontraktlari miqdori buyruqlarda belgilanmagan;
- O‘rganishda qo‘shma ta’lim dasturlari asosida ta’lim yo‘nalishlariga qabul qilingan 19 nafar abituriyentning ikkinchi bosqich bo‘yicha test sinovlarida ishtirok etishlari uchun tanlagan ta’lim yo‘nalishlari va o‘qishga qabul qilishda buyruq bilan belgilangan ta’lim yo‘nalishlari bir-biriga mos kelmasligi aniqlangan.
- Shuningdek, “Buxgalteriya hisobi va audit (tarmoqlar bo‘yicha)” ta’lim yo‘nalishi bo‘yicha test sinovida ishtirok etgan 5 nafar abituriyent “Dasturiy injiniring” ta’lim yo‘nalishiga o‘qishga qabul qilingan. Misol uchun, “Biotibbiyot muhandisligi” ta’lim yo‘nalishi bo‘yicha test sinovida ishtirok etgan abituriyent Hayitbek Asrorov “Dasturiy injiniring” ta’lim yo‘nalishiga o‘qishga qabul qilingan.
Qayd etilgan qonun buzilishi holatlarining kelib chiqishiga Buxoro muhandislik-texnologiya instituti rahbariyati va mas’ul xodimlari tomonidan ta’lim, mehnat, budjet intizomi va davlat xaridlariga oid qonun hujjatlari va sohaviy normativ-huquqiy hujjatlar ijrosi ta’minlanmagani hamda yetarli nazorat o‘rnatilmagani sabab bo‘lgan.
Bayon etilganlarga ko‘ra, O‘zbekiston prezidentining “O‘zbekiston Respublikasida korrupsiyaga qarshi kurashish tizimini takomillashtirish bo‘yicha qo‘shimcha chora-tadbirlar to‘g‘risida”gi farmonining 4-bandiga asosan Oliy va o‘rta maxsus ta’lim vazirligiga Korrupsiyani keltirib chiqaruvchi sabab va shart-sharoitlarni bartaraf etish choralarini ko‘rish to‘g‘risida taqdimnoma kiritilgan.
Avvalroq Toshkentda 32 ta uy-joy shirkati jami 3,5 mlrd so‘mni maqsadsiz sarflagan yoki talon-toroj qilgani to‘g‘risida xabar berilgandi.
Izoh (0)