Қирғиз-тожик чегарасини делимитация қилиш бўйича музокараларда олдинга силжиш бор, бироқ баҳсли ҳудудлар билан боғлиқ масалалар «ҳамон муаммоли». Уларни ҳал қилишда «эҳтиёткорлик, бағрикенглик ва изчиллик» талаб қилинади. Бу ҳақда Қирғизистон президенти Садир Жапаров қирғиз-тожик чегарасида 2021 йилнинг апрелида бўлиб ўтган йирик можаронинг бир йиллиги муносабати билан ватандошларига йўллаган мурожаатида айтиб ўтди.
Жапаров давлат чегараси билан боғлиқ масалаларни ҳал қилишда ҳам қирғиз халқининг миллий манфаатларини, ҳам қўшни Тожикистон манфаатларини ҳурмат қилган ҳолда иш олиб боришга ваъда берди.
«Биз қўшни давлатнинг манфаатлари ва яхлитлигини ҳурмат қиламиз. Бунинг учун менинг сиёсий хоҳишим етарли. Шу билан бирга, биз иғвогарчиликка йўл қўймаймиз, вазминлик билан давлат чегарасида юзага келиши мумкин бўлган салбий ҳолатларнинг олдини оламиз, миллий хавфсизликни мустаҳкамлаймиз», — деди у.
Жапаров ўтган йили биринчи марта давлат бюджети маблағлари ҳисобидан замонавий ҳарбий техника харид қилинганини, бу маблағлар Чегара хизматини жиҳозлаш учун сарфланганини эслатди. «Бу борадаги ишлар давом эттирилади», – дея қўшимча қилди давлат раҳбари.
Унинг қайд этишича, Боткен вилоятидаги можародан кейин ёниб кетган уйлар ўрнига 140 та янги уй қурилган. Тўқнашувларда ҳалок бўлган 36 кишининг оилалари учун ҳам уйлар ажратилган. Ўзбекистон, Туркия, қатор ислом хайрия жамғармалари ва маҳаллий ҳомийлар жабрланганлар учун уй-жой, мактаблар ва бошқа инфратузилма объектларини тиклашда ёрдам кўрсатган.
2021 йилнинг 28—29 апрель кунлари қирғиз-тожик чегарасида содир бўлган йирик қуролли тўқнашувда ҳар икки томондан жами 55 киши ҳалок бўлган, 300 га яқин одам жароҳатланган эди. Музокаралар натижасида можарога барҳам берилди, шундан сўнг Тожикистон ва Қирғизистон умумий чегарани делимитация қилиш бўйича ишларни фаоллаштирди. Ўтган йил давомида икки давлат топографик ишчи гуруҳларининг бир неча учрашувлари бўлиб ўтди, охиргиси апрель ойи бошида ўтказилди.
Изоҳ (0)