Самарқанд вилояти Нуробод туманида фуқарони ишга киритиб қўйишни ваъда қилиб, эвазига пул талаб қилган тез ёрдам бўлими мудири ушланди, деб хабар беради Бош прокуратура ҳузуридаги департамент.
Маълум қилинишича, департамент ҳамда ДХХнинг Нуробод тумани бўлимлари томонидан ИИБ ходимлари билан ҳамкорликда тезкор тадбир ўтказилган. Тадбирда туман тиббиёт бирлашмасининг тез ёрдам бўлими мудири Я.Б. фуқаро Ф.дан уни туман тиббиёт бирлашмасига танишлари ёрдамида патронаж ҳамшираси вазифасига 0,75 штат бирлигида ишга қабул қилишни ваъда қилгани аниқланган. Хизмати эвазига у фуқародан 500 долларни фирибгарлик йўли билан олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Оҳангаронда фуқарони металлургия комбинатига ишга киритиш учун 3 минг доллар сўраган шахслар ушлангани, Навоийда олий тоифали суд тиббий эксперти 1,5 млн сўм пора билан қўлга тушгани, Наманганда аёл 18 нафар фуқарони шифохонага ишга жойлаш учун 300 ва 500 доллардан олгани тўғрисида хабар берилганди.
Изоҳ (0)