Ўзбекистонга йилнинг биринчи чорагида қарийб 1,5 млрд доллар миқдорида пул ўтказмалари амалга оширилди

Ўзбекистонга 2022 йилнинг 1-чорагида 1,47 миллиард доллар ҳажмида пул ўтказмалари амалга оширилди. Бу ҳақда Ташқи меҳнат миграцияси агентлиги хабар қилди.

Қайд этилишича, январь—март ойларида амалга оширилган трансчегаравий пул ўтказмалари ҳажми ўтган йилнинг шу даврига нисбатан 3 фоизга ошган (1,42 миллиард доллар).

Шу даврда тижорат банклари томонидан жисмоний шахслардан жами 2,11 миллиард доллар миқдорида ёки 2021 йилнинг мос даврига нисбатан 38 фоиз (585 миллион доллар) кўп хорижий валюта сотиб олинган.

Тижорат банклари орқали жисмоний шахсларга жами 1,73 миллиард доллар миқдорида ёки 2021 йилнинг мос даврига нисбатан 69 фоиз (709 миллион доллар) кўп хорижий валюта сотилган.

Марказий банки маълумотларига кўра, бугунги кунда тижорат банкларида «Золотая Корона», Western Union, Contact, MoneyGram, «Мигом», Unistream, RIА Money Тransfer, «Азия-Экспресс», Intel Express, UPТ каби халқаро пул ўтказмалари тизимлари хизмат кўрсатмоқда.