Париж олти нафар россиялик дипломатни persona non grata деб эълон қилди. Махсус хизматлар уларнинг Франция миллий манфаатларига қарши ишлаганини аниқлаган. Бу ҳақда Франция ТИВ расмий сайтида маълумот берилган.
«Ички хавфсизлик бош бошқармаси (DGSI) томонидан узоқ вақт давомида олиб борилган суриштирувдан сўнг 10 апрелда Россия махсус хизматлари томонидан бизнинг ҳудудда сирли операция амалга оширилгани фош қилинди», — дейилади вазирлик баёнотида.
ТИВ баёнотига кўра, олти нафар россиялик агент Францияда дипломат ниқоби остида яшаб юрган. Россия элчиси мамлакат ҳудудида бўлмагани туфайли Франция ТИВ қарорни эълон қилиш учун унинг ўринбосарини чақирган.
«Улар ҳаммани биз ўз позициямизни ўзгартиришимизга умид қилиб чиқариб юбормаяпти. Биз ўз нуқтаи назаримизда қоламиз», — дея ҳолат юзасидан изоҳ берган Россия ТИВ вакили Мария Захарова.
Шунингдек, Захарова Франция ташқи ишлар вазирлигига мурожаат қилиб, Париж Украинанинг Минск келишувларига риоя қилишга мажбур этганида Европада тинчлик ва барқарорлик ҳукм сурган бўлишини эслатган. Унинг сўзларига кўра Москва Парижга бу борада тегишли жавобни беради.
Бир ҳафта аввал 4 апрелда Франция ТИВ кўплаб россиялик дипломатларнинг мамлакатдан чиқариб юборилишини эълон қилганди.
«Бу Европа вазиятга билдираётган муносабатнинг бир қисми бўлган ҳаракат. Энг биринчи мажбуриятимиз французлар ва европаликлар хавфсизлигини таъминлаш», — дейилган бир ҳафта аввал Франция ТИВ эълон қилган баёнотда.
Франция ОАВ ўшанда гап 30-35 нафар россиялик дипломатнинг чиқариб юборилиши ҳақида кетаётгани хусусида хабар берган. Захарова эса Москванинг ушбу «сургунлар»га «муносиб жавоб» беришини айтганди.
Бундан олдин Хорватия, Дания, Франция, Германия, Польша, Болгария, Латвия, Литва ҳамда Эстония давлатлари россиялик дипломатларни чиқариб юборганди. Европа Иттифоқининг бир қанча мамлакатлари, хусусан, Бельгия, Нидерландия, Чехия ва Ирландия ҳам ўнлаб россиялик дипломатларни «сургун» қилган.
Изоҳ (0)