«Сбербанк» онлайн иловасини санкциялар туфайли App Store’да энди юклаб олиш ва янгилаш имконияти йўқ. Бу ҳақда банк матбуот хизматига таяниб «Ведемости» хабар бермоқда.
Қайд этилишича, шу пайтгача ўрнатилган иловалар iOS’да чекловларсиз ишлайди. Google Play’да банк иловасини юклаб олиш мумкин.
Санкциялар туфайли iOS платформасидаги «Сбербанк» онлайн мобил иловасини App Store’да юклаб олиш ва янгилаш имкони мавжуд эмас. Илгари ўрнатилган иловалар ишлашда давом этади, ундан фойдаланишда ҳеч қандай чекловлар йўқ. Мижозларга ўрнатилган банк иловасини ўчириб ташламасликни тавсия қиламиз, — дейилади хабарда.Банк мижозлари барча керакли операцияларни амалга ошириш учун ‘‘Сбербанк’’ онлайн веб-версиясидан фойдаланишлари мумкинлигини эслатди. Банк «Сбербанк» тизими ва инфратузилмаси нормал ишлаётганини ва мижозлар маблағлари хавфсиз эканини таъкидлади.
6 апрель куни АҚШ «Сбербанк»га нисбатан янги санкцияларни жорий қилди: банк активлари музлатилади, АҚШ фуқаролари ва компанияларига кредит ташкилоти билан бизнес юритиш тақиқланади. Контрагентлар 13 апрелгача банк билан барча муносабатларни якунлашлари керак.
24 февраль куни Қўшма Штатлар ушбу банкга нисбатан юмшоқроқ санкциялар жорий қилиб, мамлакатдаги барча молия институтларига 30 кун ичида банкдаги вакиллик ҳисобларини ёпишни, банк ва унинг 25 та шўъба корхонаси билан боғлиқ ҳар қандай операцияларни тўхтатишни буюрди.
Аввалроқ «Сбербанк» ҳамда «Алфабанк»ка нисбатан санкциялар жорий қилгани ҳақида хабар қилинган эди.
Изоҳ (0)