Американинг Жонс Ҳопкинс университети маълумотларига кўра, дунёда коронавирусга чалинганлар сони 500 миллиондан ошди. Пандемия бошлангандан бери дунё бўйлаб 6 182 982 киши COVID-19 дан вафот этди.
Касалланганлар ва вафот этганлар сони бўйича доимгидек АҚШ етакчилик қилмоқда, мамлакатда инфекцияга чалинганлар сони 80 456 912 нафарга, касаллик қурбонлари сони эса 986 019 нафарга етган.
АҚШдан кейинги ўринда Ҳиндистон турибди, мамлакатда касалланганлар сони 43 миллиондан, вафот этганлар сони 521 мингдан ошган. Бразилия 30, 1 миллион касалланиш ҳолати ва 661 минг ўлимлар билан юқори учликдан жой олган.
Айни вақтга қадар жаҳон бўйича 11,119 миллиард доза вакцина қўлланган.
Жаҳон соғлиқни сақлаш ташкилоти омикрон штаммининг янги турларидан хавотирда, деб ёзмоқда Deutsche Welle.
Нашр маълумотларига кўра, ташкилот омикрон штаммининг иккита янги кичик тури — БА.4 ва БА.5 вариантларини кузатмоқда. ЖССТ ушбу штаммларнинг қай даражада юқумлилигини аниқлаш учун уларни ўз рўйхатига киритган.
Бундан ташқари, ЖССТ раҳбари Тедрос Адҳаном Гебрейесус дунёда COVID-19 пандемияси ҳали тугамаганини айтди. Унинг таъкидлашича, ўтган ҳафтада COVID-19 дан ўлимлар сони пандемиянинг икки йилидаги энг паст даражани кўрсатган, аммо вирус ривожланишда давом этмоқда.
Аввалроқ Бельгияда омикроннинг БА.4 варианти билан илк касалланиш ҳолат қайд этилганди. Бунга қадар Ҳиндистонда коронавируснинг янги XE штамми билан касалланиш бўйича биринчи ҳолат тасдиқланган. XE — омикрон штаммининг икки кичик туридан иборат гибрид бўлиб, у бошқа мутацияларга қараганда 10 фоиз тезроқ юқиши мумкин.
Изоҳ (0)