Германиянинг Rheinmetall концерни Украинага 50 та «Леопард 1» эски танкларини етказиб беришга қарор қилди

Германиянинг Rheinmetall концерни Украинага аввал фойдаланилган «Леопард 1» эски танкларидан 50 та етказиб беришга қарор қилди. Бу ҳақда Handelsblatt газетасига таяниб, DW хабар тарқатган.

Гап турли мамлакатлар армиялари захирасидаги танклар ҳақида бормоқда. Айни вақтда концерн ҳарбий машиналарнинг ҳолатига баҳо бермоқда.

Хабарга кўра, танкларни етказиб бериш олти ҳафтадан кейин бошланиши, тахминан, уч ой давом этиши мумкин. Концерн профессионал ҳарбийлар ушбу танклар билан ишлаш кўникмаларини ўзлаштириб олишига жуда қисқа, яъни бир неча кун вақт кетишини қайд этган.

Украинага танкларни юбориш учун Германия ҳукуматининг рухсатномасини олиш талаб этилади. 11 апрелда Германия Федератив Республикаси ташқи ишлар вазири Анналена Бербок Украинага оғир артиллерия қуроллари кераклиги ва ҳарбий ёрдам кўрсатишни пайсалга солишнинг вақти эмаслигини таъкидлаган.

Украина ҳукумати Москва февраль охирида мамлакат ҳудудида ҳарбий операциялар бошлаганидан бери бир неча марта оғир артиллерия қуроллари, хусусан, Россияга қарши туриш учун танкларга эҳтиёж борлиги юзасидан баёнотлар берган.

Аввал Украина президенти Владимир Зеленскийнинг Жанубий Кореядан қурол сўрагани, Германия ҳукуматининг украиналик қочоқларни мамлакатга жойлаштириш учун 2 миллиард евро ажратиши, Эстония Украинага гаубица, танкка қарши ракета, мина ва дронлар партиясини етказиб бергани ҳақида хабарлар берилган.