Европа Иттифоқи Россияга қарши олтинчи санкциялар пакети устида иш бошламоқда, у нефть билан боғлиқ чекловларни ўз ичига олади. Бу ҳақда Литва ташқи ишлар вазири Габриэлюс Ландсбергис Евроиттифоқ ташқи ишлар вазирлари саммити аввалида маълум қилди.
«Еврокомиссия нефть билан боғлиқ чекловларни ўз ичига оладиган олтинчи санкциялар пакети устида иш бошлашимиз ҳақида аниқ айтди. Бу консенсусга (якдиллик — таҳр.) эришиш устида иш бошлаганимизни билдиради», — дейди Ландсбергис.
Нефть эмбаргоси бундан олдинги бешинчи чекловлар пакетидан ўрин олмаганди, бироқ Брюссель мазкур секторга санкциялар қўллашни муҳокама қилиши ҳақида огоҳлантирган эди. Европа комиссияси раҳбари Урсула фон дер Ляеннинг маълум қилишича, муҳокамада Россия нефти импортида солиқ солиш ёки эскроу-ҳисоблар каби «алоҳида тўлов каналлари»га оид ғоялар инобатга олинади.
Эскроу-ҳисоб — муайян ҳолатлар юзага келгунга ёки муайян мажбуриятлар бажарилгунга қадар мулк, ҳужжатлар ёки маблағлар инобатга олинадиган махсус шартли ҳисоб. Бу 2013 йилда Эронга қарши санкцияларга қўлланган. Ўшанда АҚШ бошқа мамлакатга иккиламчи санкциялар орқали қўрқитиб, унинг нефтини сотишни тақиқлаган. Натижада муроса варианти танланган: давлатлар Эрон учун тўловларни ўз валюталарида махсус ҳисоб рақамига киритади, унинг маблағлари фақат ушбу мамлакатлардан рухсат этилган товарларни Эронга олиб кириш учун ҳисобдан чиқарилиши мумкин. Шу орқали Теҳрон валютани тўғридан-тўғри олмаган, бунинг ўрнига бартер товарлари билан таъминланган.
Европа Иттифоқи импорт қиладиган нефтнинг 25 фоизи Россия ҳисобига тўғри келади. Еврокомиссия маълумотларига кўра, 2021 йилда ЕИга аъзо давлатлар Россиядан 48,5 миллиард евролик нефть, 22,4 миллиард евролик нефть маҳсулотларини импорт қилган.
Аввалроқ АҚШ президенти Жо Байден Россия нефти ва газини импорт қилишни тақиқловчи қонунни имзолаганди.
Изоҳ (0)