Футбол бўйича Испания Ла Лигасининг 31-туридан ўрин олган бир қатор учрашувлар 10 апрель, якшанба куни бўлиб ўтди.
«Барселона» сафарда «Леванте»га қарши ўйин ўтказди. Учрашувда ҳисоб 52-дақиқага келиб очилди: мезбонлар вакили Хоче Луис Моралес пенальтини аниқ амалга оширди. Орадан тўрт дақиқа ўтиб, каталонлар дарвозаси томон яна бир 11 метрлик жарима зарбаси белгиланди, бироқ ундан Рохер Марти унумли фойдалана олмади.
59-дақиқада Пьер-Эмерик Обамеянг қанотдан узатилган тўпни боши билан дарвозага жойлаб қўйди. Кўп ўтмай Педри «Барселона»ни ҳисобда олдинга олиб чиқди.
83-дақиқада Гонсало Мелеро яна бир пенальтини муваффақиятли амалга оширди ва мезбонларнинг иккинчи голини урди. Барчаси дуранг томон кетаётганда Люк де Йонг қўшиб берилган дақиқаларда меҳмонларнинг ғалаба тўпини киритди.
Ушбу ғалабадан кейин «Барселона» очколарини 60 тага етказиб, иккинчи ўринни сақлаб қолди. Битта захира ўйинига эга каталонияликлар пешқадам «Реал»дан 12 очкога ортда қолмоқда. «Леванте» (22) 19-поғонада қолди.
Ла Лига
31-тур баҳслари
10 апрель, якшанба
«Леванте» — «Барселона» 2:3
Голлар: 1:0 – 52, пенальти Моралес, 1:1 – 59 Обамеянг, 1:2 – 63 Педри, 2:2 – 83, пенальти Мелеро, 2:3 – 90+2 Люк де Йонг.«Леванте»: Карденас, Мирамон, Постиго, Везу (Кантеро, 76), Робер, Сон, Кампанья (Мелеро, 65), Радоя (Барди, 76), Пепелу, Моралес (Пубил, 90), Рохер Марти (Дани Гомес, 65).
«Барселона»: тер Штеген, Дани Алвес (Лангле, 81), Араухо, Эрик Гарсия, Альба, Бускетс, Френки де Йонг (Гави, 57), Нико Гонсалес (Педри, 56), Обамеянг (Люк де Йонг, 84), Дембеле (Траоре, 84), Ферран Торрес.
Огоҳлантиришлар: Кампанья (11), Араухо (87).
Изоҳ (0)