Жиноят ишлари бўйича Пахтаобод туман суди аёллар билан интернет орқали танишиб, уларнинг интим фото ва видеоларини тарқатмаслик учун улардан пул ундириб келган шахсга ҳукм ўқиди. Бу ҳақда «Дарё»га Андижон вилоят суди ахборот хизмати хабар берди.
Аниқланишича, судланувчи Камрон (барча исм-шарифлар ўзгартирилган) 2018 йилнинг август ойида Раъно билан Instagram орқали танишиб, Россиянинг Зеленоград шаҳрида кўришган. Иккинчи ва учинчи учрашувдан сўнг уларнинг ўртасида илиқлик пайдо бўлиб, Москва шаҳрида яшай бошлаган. 2018 йилнинг сентябрь ойидан 2019 йил апрель ойига қадар бирга яшаган ёшлар 2019 йилда ажрашган.«Камрон билан дастлаб дўстона гаплашиб юрдик, кейин у мени ўзи ижарада яшайдиган уйда бирга яшашга таклиф қилди. Шу вақт давомида Android планшетимни олиб, фотосуратларимни монтаж қилиб, уларни интернет тармоғига жойлаштиришини, бундан ташқари яқин қариндошларимга жўнатиб юборишини айтиб, шарманда бўлишни истамасам 18 минг рубль беришимни айтди. Обрўм тўкилишидан қўрқиб, банк орқали унинг ҳисоб рақамига бўлиб-бўлиб қўлимдан келганича жами 15 минг рубль пул жўнатдим. Лекин у бундан қаноатланмасдан яна пул сўрашда давом этди. Унинг ҳаракатларидан норози бўлиб, бир неча маротаба Москвадаги Ўзбекистон элчихонасига мурожаат қилдим. Аммо ҳеч қандай чора кўрилмади», — дейди судда кўрсатма берган жабрланувчи.
Судда аниқланишича, судланувчи жиноий ишини давом эттириб, Facebook орқали Тошкент шаҳрида яшовчи Гуллола исмли аёл билан ҳам танишиб, унга севган аёли уни ташлаб, пулларини ўғирлаб кетганини, ўзи эса Москвада пулсиз, уйсиз қолиб кетганини, ҳозирда ушбу аёлни қидириб топиши лозимлиги ҳақида ёзиб, ишончига кирган. Камрон Гуллола билан муносабатлари давомида ундан аввалига 500 доллар, кейинчалик 2019 йилнинг 19 июль кунидан 2020 йилнинг 29 сентябрь кунига қадар жами 4 минг 650 доллар пул олган. Олган пулларини қайтармаслик мақсадида аёл жўнатган расм ва видеолавҳаларни турмуш ўртоғига, фарзандларига жўнатиб юборишини ёки интернет тармоғига жойлаб, шарманда қилишини айтиб қўрқитган.
Мазкур ишни кўриб чиққан судья Шуҳрат Мирзакаримов Камронни Жиноят кодексининг 165-моддаси 2-қисми «а» банди (жуда кўп миқдорда товламачилик)да айблаб, унга нисбатан 5 йилга озодликдан маҳрум қилиш жазосини тайинлаган. Шунингдек, судланувчидан жабрланувчилар Гуллола фойдасига 4 минг 650 доллар ҳамда Раъно фойдасига 2 миллион 140 минг сўм пул ундирилиши белгиланган.
Изоҳ (0)