Олий ва ўрта махсус таълим вазирлиги «Ўзбекистон Республикасининг айрим қонун ҳужжатларига ўзгартиш ва қўшимчалар киритиш ҳақида»ги қонун лойиҳасини муҳокамага қўйди.
Қонун лойиҳасида қуйидагилар таълим ташкилотларида педагог (профессор-ўқитувчи) сифатида фаолият олиб бориши тақиқланиши белгиланган:
- суд томонидан муомалага лаёқатсиз ёки муомала лаёқати чекланган деб топилган шахслар;
- қасддан содир этган жинояти учун судланганлик ҳолати тугалланмаган ёки судлангани олиб ташланмаган шахслар;
- ҳаётга, соғлиққа қарши жиноятлар, ҳаёт ёки соғлиқ учун хавфли бўлган жиноятлар, жинсий эркинликка, оилага, ёшларга ва ахлоққа қарши, шахснинг озодлигига, шаъни ва қадр-қимматига қарши (бундан туҳмат, ҳақорат қилиш мустасно), фуқароларнинг конституциявий ҳуқуқ ва эркинликларига қарши, тинчликка ва инсониятнинг хавфсизлигига қарши, шунингдек, ўзгаларнинг мол-мулкини талон-торож қилиш билан боғлиқ бўлган жиноятлар, жиноий йўл билан топилган мол-мулкни олиш ёки ўтказиш, гиёҳвандлик воситаларининг ёки психотроп моддаларнинг қонунга хилоф муомаласидан иборат жиноятлар, жамоат тартибига қарши жиноятлар ва ҳарбий мансабдорлик жиноятлари содир этганлик учун илгари ҳукм қилинганлар;
- психиатрия ёки наркология муассасаларида ҳисобда турган шахслар;
- педагоглик (профессор-ўқитувчилик) фаолиятини амалга оширишга тўсқинлик қиладиган касалликка чалинган шахслар.
Маълумот учун, «Таълим тўғрисида»ги қонун билан таълим ташкилотлари педагог ходимларининг ҳуқуқий мақоми белгиланган. Унга кўра, тегишли маълумоти, касбий тайёргарлиги бўлган ва маънавий-ахлоқий фазилатларга эга шахслар педагогик фаолият билан шуғулланиш ҳуқуқига эга.
Изоҳ (0)