«Давлат пенсиялари, нафақалар, компенсациялар ва бошқа ижтимоий тўловларни тўлаш тизимини янада такомиллаштиришга доир қўшимча чора-тадбирлар тўғрисида»ги президент қарори қабул қилинди, деб хабар беради Telegram’даги «Ҳуқуқий ахборот» канали.
Қарорга мувофиқ, 2022 йил 1 майдан:
- «Темир дафтар», «Ёшлар дафтари» ва «Аёллар дафтари»га киритилганларга ва жазони ўтаб озодликка чиққан фуқароларга бериладиган тўловлар ҳар ойнинг 5-санасигача молиялаштирилади ҳамда «Халқ банки»нинг сайёр кассалари томонидан маҳаллаларга етказилади;
- «Халқ банки» томонидан пенсия, нафақалар ва моддий ёрдамни фуқароларга нақд етказиш хизматлари учун Пенсия жамғармаси ва бюджетдан 1 фоиз банкка хизмат ҳақи тўлаб берилади;
- пенсия, нафақа, компенсациялар ва моддий ёрдам пулини банк карталари орқали олувчиларга ҳар ойлик пенсия ва нафақа пулининг 1 фоизи миқдорида қўшимча тўлов жорий қилинади;
- 2022 йил 1 сентябргача ҳарбийлаштирилган пенсиялар тизими автоматлаштирилади ва пенсия варақаларини юритиш амалиёти бекор қилинади.
2022 йил якунигача пенсия ва нафақа олувчилар маблағларини масофадан бошқариш имконини берувчи банкнинг янги мобил иловаси ишлаб чиқилади.
Мазкур қарорда белгиланган чора-тадбирлар билан боғлиқ харажатларни молиялаштириш учун зарур маблағлар бюджетдан ташқари Пенсия жамғармаси ва тегишли мақсадли жамғармаларнинг қолдиқ маблағлари ҳамда республика бюджети маблағлари ҳисобидан ажратилади.
Маълумот учун, 2022 йил 1 январь ҳолатига Ўзбекистонда пенсия ва нафақа олувчиларнинг умумий сони 4 миллион 39 минг 2 нафарга етган. Шундан 3 миллион 588 минг 4 нафари пенсия, 450,8 минг нафари нафақа олувчилар ҳисобланади.
Аввалроқ Ўзбекистонда пенсия ёшига етган ходимларни ишдан бўшатиш тақиқланаётгани тўғрисида хабар берилганди.
Изоҳ (0)