Қозоғистоннинг SCAT Airlines авиакомпанияси Наманганга илк парвозни амалга оширди. Бу ҳақда «Дарё» мухбири Азизбек Абдувалиев хабар бермоқда.
Boeing 737 русумли ҳаво кемаси Наманган халқаро аэропортида тантанали кутиб олинди.
Самолёт бугун, 8 апрель куни соат 02:33 да Наманган—Олмаота йўналишида 170 нафар йўловчини Қозоғистонга олиб кетди.
Қозоғистондаги йирик авиаташувчилардан бўлган ва штаб-квартираси Чимкентда жойлашган SCAT Airlines бугунги кунда мамлакатнинг ички йўналишларидан ташқари Россия, Хитой, Туркия, Япония, Мўғулистон, Грузия, Озарбайжон ва Арманистон каби ўндан ортиқ давлатларга халқаро парвозларни амалга ошириб келмоқда.
Авиакомпания Наманганга ва бу ердан Олмаотага парвозларни мунтазам йўлга қўйиш ҳамда ҳафтасига икки маротаба — душанба ва жума кунлари рейсларни амалга оширишни режалаштирган.
Эслатиб ўтамиз, олдинроқ Uzbekistan Airways авиакомпанияси «Шарқий хаб» лойиҳаси доирасида Наманган—Олмаота—Наманган йўналишида янги мунтазам авиақатновни йўлга қўйгани ҳақида хабар берилганди.
Изоҳ (0)