Оқ уй Россия президентининг вояга етган барча қизларига нисбатан санкциялар жорий қилди, дея хабар берган Associated Press.
Шунингдек, АҚШнинг санкциялар рўйхатига Россия ташқи ишлар вазири Сергей Лавровнинг рафиқаси ва қизи, 18 нафар амалдор киритилган. Улар орасида Москва мери Сергей Собянин, Россия бош вазири Михаил Мишустин ҳам бор, деб ёзмоқда Оқ уйдаги исмини ошкор этмаган манбага таяниб Reuters.
Бундан ташқари Вашингтон «Сбербанк» ва «Алфабанк»ка нисбатан ҳам блоклаш санкцияларини қўллади (бунда ушбу банклардаги энергетика боғлиқ операциялар тақиқдан вақтинча холи бўлади). Шу билан бирга, Россиянинг катта давлат муассасаларига ҳам юқорида қайд этилган тақиқларнинг муқобили татбиқ этилади, деб хабар қилган CNN.
Шунингдек, АҚШ ўз юрисдиксияси доирасида Россиянинг ташқи қарзини қоплаши, мамлакатга янги инвестиция киритиш фаолиятига ҳам тақиқлар қўйди.
Буюк Британия ҳам Россияга қарши санкциялари рўйхатини янгилаган. Мамлакат 2022 йил охирига бориб Россия кўмири ва нефтини импорт қилишни тўхтатади, «Сбербанк» активларини музлатади ҳамда Россияга янги инвестиция киритилишига йўл қўймайди.
Аввалроқ Европа иттифоқининг Владимир Путиннинг қизлари Катерина Тихонова ва Мария Воронцовага санкция қўллаш имкониятларини ўрганаётганини хабар қилинганди.
Bloomberg агентлиги бундан кўзланган асосий мақсад Путиннинг эътиборини жалб қилиш эканлиги қайд этган.
Ғарб мамлакатлари Россия февраль охирида Украинада ҳарбий ҳаракатларни бошлаганидан кейин санкциялар эълон қилишни бошлаган, шунингдек, Киев вилоятидаги аҳоли яшаш пунктлари ҳамда Буча шаҳридан россиялик ҳарбийлар чиқиб кетганидан кейин минглаб тинч аҳоли вакилларининг жасадлари топилганидан сўнг Ғарбнинг Москвага нисбатан тақиқлари сони ортган. Россия расмийлари Бучадаги одамларнинг ўлимига алоқадорлигини инкор этмоқда.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)