5 апрель куни Шавкат Мирзиёевнинг Покистон бош вазири вазифасини бажарувчи Имрон Хон билан телефон орқали мулоқоти бўлиб ўтди, деб хабар бермоқда президент матбуот хизмати.
Қайд этилишича, раҳбарлар муқаддас Рамазон ойи кириб келгани билан бир-бирларини самимий табриклаб, ҳар икки мамлакатларнинг дўст халқларига тинчлик-осойишталик, фаровонлик ва бардавом равнақ тилади.
2022 йил 3—4 март кунлари Покистонга амалга оширилган олий даражадаги давлат ташрифи якунида қабул қилинган қўшма «йўл харитаси» ижросининг бориши кўриб чиқилди. Энг аввало, савдо, саноат, қишлоқ хўжалиги, фармацевтика, туризм, маданият ва бошқа устувор йўналишлардаги кўп қиррали ҳамкорлик лойиҳа ва дастурларини ўз вақтида амалга ошириш муҳимлиги таъкидланди.
Суҳбат давомида минтақавий ҳамкорлик масалалари юзасидан ҳам фикр алмашилган.
Мулоқот якунида Ўзбекистон етакчиси Покистон ҳукумати раҳбари ва халқига ушбу мамлакатда бўлажак муҳим сиёсий тадбир — парламент сайлови муваффақиятли ўтишини тилаган.
Anadolu маълумотларига кўра, бундан бир неча кун аввал Покистон президенти Ориф Алвий бош вазир Имрон Хон таклифига биноан Миллий ассамблеяни (парламент қуйи палатасини) тарқатиб юборганди. Шундан сўнг Имрон Хон муваққат бош вазир тайинлангунига қадар бош вазир бажарувчиси лавозимига ўтди. Янги парламент сайловлари 90 кундан сўнг бўлиб ўтади.
Мавзуга доир:
- Шавкат Мирзиёев Покистон президенти Ориф Алвий билан учрашди
- Шавкат Мирзиёев Покистон бош вазири Имрон Хон билан тор доирада музокара ўтказди
- Шавкат Мирзиёев Исломободда Покистоннинг етакчи компаниялари раҳбарлари билан учрашди
- Шавкат Мирзиёев ва Имрон Хон раислигида икки мамлакат делегациялари ўртасида йиғилиш бўлиб ўтди
Изоҳ (0)