5-aprel kuni Shavkat Mirziyoyevning Pokiston bosh vaziri vazifasini bajaruvchi Imron Xon bilan telefon orqali muloqoti bo‘lib o‘tdi, deb xabar bermoqda prezident matbuot xizmati.
Qayd etilishicha, rahbarlar muqaddas Ramazon oyi kirib kelgani bilan bir-birlarini samimiy tabriklab, har ikki mamlakatlarning do‘st xalqlariga tinchlik-osoyishtalik, farovonlik va bardavom ravnaq tiladi.
2022-yil 3—4-mart kunlari Pokistonga amalga oshirilgan oliy darajadagi davlat tashrifi yakunida qabul qilingan qo‘shma “yo‘l xaritasi” ijrosining borishi ko‘rib chiqildi. Eng avvalo, savdo, sanoat, qishloq xo‘jaligi, farmatsevtika, turizm, madaniyat va boshqa ustuvor yo‘nalishlardagi ko‘p qirrali hamkorlik loyiha va dasturlarini o‘z vaqtida amalga oshirish muhimligi ta’kidlandi.
Suhbat davomida mintaqaviy hamkorlik masalalari yuzasidan ham fikr almashilgan.
Muloqot yakunida O‘zbekiston yetakchisi Pokiston hukumati rahbari va xalqiga ushbu mamlakatda bo‘lajak muhim siyosiy tadbir — parlament saylovi muvaffaqiyatli o‘tishini tilagan.
Anadolu ma’lumotlariga ko‘ra, bundan bir necha kun avval Pokiston prezidenti Orif Alviy bosh vazir Imron Xon taklifiga binoan Milliy assambleyani (parlament quyi palatasini) tarqatib yuborgandi. Shundan so‘ng Imron Xon muvaqqat bosh vazir tayinlanguniga qadar bosh vazir bajaruvchisi lavozimiga o‘tdi. Yangi parlament saylovlari 90 kundan so‘ng bo‘lib o‘tadi.
Mavzuga doir:
- Shavkat Mirziyoyev Pokiston prezidenti Orif Alviy bilan uchrashdi
- Shavkat Mirziyoyev Pokiston bosh vaziri Imron Xon bilan tor doirada muzokara o‘tkazdi
- Shavkat Mirziyoyev Islomobodda Pokistonning yetakchi kompaniyalari rahbarlari bilan uchrashdi
- Shavkat Mirziyoyev va Imron Xon raisligida ikki mamlakat delegatsiyalari o‘rtasida yig‘ilish bo‘lib o‘tdi
Izoh (0)