Шавкат Мирзиёев 5 апрель куни Қозоғистон президенти Қосим-Жўмарт Тўқаев билан телефон орқали мулоқот қилди, деб хабар бермоқда давлат раҳбари матбуот хизмати.
Қайд этилишича, президентлар Рамазон ойи бошлангани билан бир-бирларини самимий табриклаб, биродар Ўзбекистон ва Қозоғистон халқларига фаровонлик ва равнақ тилади.
Олий даражада эришилган келишувларни амалга ошириш масалалари кўриб чиқилди.
Ўзаро савдони кўпайтириш, саноат кооперацияси бўйича қўшма лойиҳаларни илгари суриш, маданий-гуманитар дастур доирасида фаол алмашинувларни давом эттиришга алоҳида эътибор қаратилди.
Шунингдек, минтақавий ҳамкорликнинг долзарб жиҳатлари, шу жумладан, 2022 йил сентябрида Ўзбекистонда ШҲТ саммитини ўтказиш ва унга тайёргарлик кўриш юзасидан фикр алмашилди.
Давлат раҳбарларининг бундан аввалги телефон орқали мулоқоти 16 март куни бўлиб ўтганди. Президентлар Наврўз байрами муносабати билан бир-бирини табриклаб, икки томонлама муносабатлар кун тартиби ва Марказий Осиёда минтақавий ҳамкорликнинг долзарб масалаларини муҳокама қилганди.
3 март куни бўлиб ўтган суҳбатда эса Ўзбекистон—Қозоғистон дўстлик, стратегик шериклик ва иттифоқчилик муносабатларини янада мустаҳкамлаш, ўзаро манфаатли амалий ҳамкорликни кенгайтиришнинг долзарб масалалари муҳокама қилинганди.
Изоҳ (0)