4 апрель куни Юнусобод туманининг Алишер Наввоий кўчаси, «Туркистон» санъат саройига кириш қисмидаги тераклар кесиб ташланди, деб хабар беради Telegram’даги «Экологуз» канали. Тошкент шаҳар экология ва атроф-муҳитни муҳофаза қилиш бошқармасининг маълум қилишича, дарахтлар табиий омиллар таъсирида кучли зарарланган.
Давлат ўрмон фондига кирмайдиган дарахтлар ва буталарни кесиш юзасидан 351-сонли хулосасига кўра, кесилган тўртта терак ва битта чинор «касалланган, қуриган, шунингдек, инсонларнинг ҳаёти ва соғлиғига ҳамда мол-мулкига таҳдид солган».
Бундан ташқари, Мирзо Улуғбек тумани Буюк ипак йўли кўчасида ҳам дарахтлар кесилган. Аниқланишича, Тошкент шаҳри Яккасарой тумани Бобур кўчасида 10 та чинор, 1 та шумтол, 1 та эман, жами 14 та дарахт; Мирзо Улуғбек тумани Мустақиллик шоҳ кўчаси ва Дўрмон йўли кўчаси бўйлаб 3 та каштан, 4 та арча, 2 та шумтол, 7 та қарағай жами 16 та дарахт кесилиши режалаштирилган. Қолган дарахтлар учун олинган хулосалар эътирозли сабаблар билан тақдим этилмаган.
Тошкент шаҳар экология ва атроф-муҳитни муҳофаза қилиш бошқармаси Мирзо Улуғбек тумани Буюк ипак йўли кўчасида кесилган 4 та терак ва 1 та чинор ноқонуний эмас, балки қонуний тартибда кесилган дея расмий муносабат билдирган.
Дарахтларни кесиш учун берилган хулосаларни 3 бандида ҳар бир кесилган дарахт ва буталар учун компенсация тарзида 10 туп қимматлиги жиҳатидан кесиладиган дарахт ва буталардан кам бўлмаган, йирик ўлчамли кўчат экиш, ҳамда уларни камида икки йил давомида парвариш қилиш, ноқонуний кесилган дарахт ва буталар учун эса уч йил давомида парвариш шарти билан 100 туп кўчат экиш мажбурияти юкланади, деб қайд этилган.
«Хулосаларнинг изоҳ қисмида мазкур хулосалар аризада кўрсатилган дарахтларни кесиш (буталаш кўчириб ўтазиш) учун асос бўлмайди, туман ҳокимлигининг рухсатномаси ёки қарорсиз кесиш маъмурий ва жиноий жавобгарликка олиб келади, дейилган. Хўш шаҳар ҳокимининг қарори қани? Нега Тошкент шаҳар Экология бошқармаси шаҳар ҳокими қарори билан танишмай, дарахтларни кесишга рухсат берган?», — дейилади хабарда.
Аввалроқ Сирдарёда 170 туп тол дарахти кесиб ташлангани, Сергелида «Замин» фонди 4,5 гектар майдонга 2740 туп дарахт эккани, Андижонда 25 йиллик дарахтлар ўрнида ихтисослаштирилган мактаб қурилиши тўғрисида хабар берилганди.
Изоҳ (0)