Соғлиқни сақлаш вазирлиги соҳасига оид қонунчилик ҳужжатлари коррупцияга қарши экспертизадан ўтказилганда 70 та ҳужжатнинг 13 тасида 41 та коррупциявий омил мавжудлиги аниқланган. Бу ҳақда Сенат раиси Танзила Норбоева Коррупцияга қарши курашиш миллий кенгашининг навбатдаги мажлисида айтиб ўтди, деб хабар бермоқда «Дарё» мухбири.
Маълум қилинишича, Соғлиқни сақлаш вазирлигининг комплаенс, ички аудит ва молиявий назорат хизмати томонидан 395 та даволаш-профилактика муассасаларида ўтказилган ўрганишлар давомида 59 млрд сўмдан ортиқ миқдордаги молиявий хато-камчиликлар аниқланган. Шунингдек, давлат бюджетига етказилган 9 млрд сўмлик зарар ундирилган.
Бундан ташқари, 2021 йилда «dxarid.uz» портали орқали вазирлик томонидан қиймати 23,1 млрд сўмлик давлат харидларида 11,1 млрд сўм миқдоридаги 33 та танловда қонун талаблари бузилишига йўл қўйилгани аниқланган.
Маҳаллий ҳокимликлар томонидан вазирлик тизимидаги бино ва ерларнинг ноқонуний равишда бериб юборилишига оид 40 дан ортиқ ҳолатлар кузатилган.
«Соғлиқни сақлаш вазирлиги тизимида сўнгги икки йилда 732 нафар шахс коррупциявий жиноятлар содир этганликда айбдор деб топилган. Хусусан, агар 2020 йилда 302 нафар шахс коррупциявий жиноят содир этган бўлса, 2021 йилда уларнинг сони 430 нафарга етган. Тизимдаги камчиликларни аҳоли фикрини ўрганиш натижаларидан ҳам кўриш мумкин», — дейди Сенат раиси.
Танзила Норбоеванинг айтишича, соҳага оид қонунчилик ҳужжатлари коррупцияга қарши экспертизадан ўтказилганда 70 та ҳужжатнинг 13 тасида 41 та коррупциявий омил мавжудлиги аниқланган.
Изоҳ (0)