Shavkat Mirziyoyev Pokiston prezidenti Orif Alviy bilan uchrashdi
Pokiston poytaxti Islomobod shahrida 4-mart kuni Shavkat Mirziyoyev va Pokiston prezidenti Orif Alviyning uchrashuvi bo‘lib o‘tdi. Bu haqda Prezident matbuot xizmati xabar qildi.
Qayd etilishicha, prezidentlar bir-birini samimiy qutlab, O‘zbekiston va Pokiston o‘rtasidagi strategik sheriklik munosabatlari har tomonlama rivojlanayotganini qayd etgan. Mirziyoyevning Pokistonga davlat tashrifi tarixiy ahamiyatga ega ekani hamda hamkorlikni kengaytirishga turtki bo‘lishi ta’kidlangan.
2022-yilda ikki mamlakat diplomatik munosabatlar o‘rnatilganining 30 yilligini nishonlaydi. Ta’kidlanishicha, o‘tgan vaqt mobaynida siyosiy muloqot va hamkorlikda katta muvaffaqiyatlarga erishilgan. O‘zaro tovar ayirboshlashda jadal sur’at kuzatilgab. O‘tgan yili, pandemiyaga qaramay, uning hajmi 50 foizdan ziyodga oshgan.
Uchrashuvda savdo-iqtisodiy va investitsiyaviy aloqalarni izchil kengaytirishning dolzarb masalalari muhokama qilingan. Davlat rahbarlari Pokistonga davlat tashrifi chog‘ida erishilgan kelishuvlarni olqishlagan. Hamkorlikni, shu jumladan gumanitar sohada kengaytirish uchun ulkan salohiyat mavjudligi ta’kidlangan.
Tomonlar sheriklikning ushbu yo‘nalishini har tomonlama rivojlantirishga tayyor ekanini tasdiqlagan. O‘zbekiston prezidenti astronomiya, astrofizika, fizika, matematika, virusologiya va robot texnikasi bo‘yicha ilmiy-amaliy tadbirlarni o‘tkazishda Islom hamkorlik tashkilotining “KOMSTЕK” ilmiy-texnik hamkorlik bo‘yicha doimiy qo‘mitasi imkoniyatlaridan foydalanishni taklif etgan.
Tomonlarni qiziqtirgan mintaqaviy va xalqaro ahamiyatga molik masalalar yuzasidan fikr almashilgan. Mintaqaviy xavfsizlik va Afg‘onistondagi vaziyatga alohida e’tibor qaratilgan. Shavkat Mirziyoyev Orif Alviyga mehmondo‘stlik uchun minnatdorlik bildirib, yaqinlashib kelayotgan milliy bayram – Pokiston kuni munosabati bilan samimiy tabrik va eng ezgu tilaklarini izhor etgan hamda uni o‘ziga qulay vaqtda mamlakatga tashrif bilan kelishga taklif etgan.
Uchrashuv iliq va do‘stona muhitda o‘tgan. Tomonlar ko‘p qirrali munosabatlarni kengaytirishga maqsadi qat’iy ekanini tasdiqlagan
Shu bilan Shavkat Mirziyoyev Pokistonga davlat tashrifini yakunlab, Toshkentga jo‘nab ketdi.
Eslatib o‘tamiz, Shavkat Mirziyoyev 3–4-mart kunlari Pokistonga tashrif buyurishi xabar qilingandi. Keyinroq davlat rahbari Pokistonga jo‘nab ketgani va yetib borgani haqida xabar berildi.
