Германиялик эркак коронавирусга қарши эмланганлик сертификатларини сотиш мақсадида 90 доза вакцина олди, деб хабар беради Sky News.

Маълум қилинишича, Германия шарқидаги Магдебург шаҳрида яшовчи 60 ёшли эркак бир неча ой давомида Саксония шарқидаги вакцинация марказларда қарийб 90 марта эмланган. Мамлакат қонунларига кўра, ушбу шахснинг исми ошкор этилмаган.

Гумонланувчи қўлга олинмаган, бироқ рухсатсиз эмланганлик карточкаларини сотиш ва ҳужжатларни сохталаштириш учун тергов қилинмоқда. У дори воситасининг навбатдаги дозасини олиш учун бир марказга кетма-кет икки кун келганида ушланган.

Тахминларга кўра, белгиланганидан ортиқ дозада вакцина олган эркак ҳақиқий вакцина партияси рақами туширилган сохта ҳужжатларни эмланишни истамаганларга сотиб келган. Полициячилар унинг ёнида бўлган бир нечта тўлдирилмаган эмлаш карталарини мусодара қилиб, жиноят иши очган.

Бутун пандемия давомида Германияда вакцинация сертификатлари ресторанлар, театрлар, айрим иш жойлари ва бассейнларга киришда талаб этилган. Мамлакатда 2020 йилдан бери 21,6 миллиондан ортиқ аҳолида коронавирус тасдиқланган ва 130 мингдан ортиқ бемор вафот этган.

7 апрель куни Бундестагда мамлакат аҳолисини коронавирусга қарши мажбурий эмлашга оид қонуннинг бир нечта вариантига овоз бериш жараёнлари бўлиб ўтиши кутилмоқда.