Germaniyalik erkak koronavirusga qarshi emlanganlik sertifikatlarini sotish maqsadida 90 doza vaksina oldi, deb xabar beradi Sky News.
Ma’lum qilinishicha, Germaniya sharqidagi Magdeburg shahrida yashovchi 60 yoshli erkak bir necha oy davomida Saksoniya sharqidagi vaksinatsiya markazlarda qariyb 90 marta emlangan. Mamlakat qonunlariga ko‘ra, ushbu shaxsning ismi oshkor etilmagan.
Gumonlanuvchi qo‘lga olinmagan, biroq ruxsatsiz emlanganlik kartochkalarini sotish va hujjatlarni soxtalashtirish uchun tergov qilinmoqda. U dori vositasining navbatdagi dozasini olish uchun bir markazga ketma-ket ikki kun kelganida ushlangan.
Taxminlarga ko‘ra, belgilanganidan ortiq dozada vaksina olgan erkak haqiqiy vaksina partiyasi raqami tushirilgan soxta hujjatlarni emlanishni istamaganlarga sotib kelgan. Politsiyachilar uning yonida bo‘lgan bir nechta to‘ldirilmagan emlash kartalarini musodara qilib, jinoyat ishi ochgan.
Butun pandemiya davomida Germaniyada vaksinatsiya sertifikatlari restoranlar, teatrlar, ayrim ish joylari va basseynlarga kirishda talab etilgan. Mamlakatda 2020-yildan beri 21,6 milliondan ortiq aholida koronavirus tasdiqlangan va 130 mingdan ortiq bemor vafot etgan.
7-aprel kuni Bundestagda mamlakat aholisini koronavirusga qarshi majburiy emlashga oid qonunning bir nechta variantiga ovoz berish jarayonlari bo‘lib o‘tishi kutilmoqda.
Izoh (0)