Forbes Европада Алишер Усмоновнинг иккита вертолёти хатловга олинганини хабар қилди

Европа иттифоқида санкцияларга учраган келиб чиқиши ўзбекистонлик бўлган миллиардер, USM Holdings асосчиси Алишер Усмоновга тегишли иккита вертолёт Франция ҳукумати томонидан хатловга олинди. Бу ҳақда Forbes хабар қилган.

Франция иқтисодиёт ва молия вазирлиги Airbus EC-175 (борт рақами M-DLBR) ҳамда Eurocopter EC-155 (борт рақами М-DLBА) вертолётлари хатловга олинганини билдирган. Airbus EC-175 22 март куни Le Kastelleda, иккинчи вертолёт эса 25 мартда Монте-Карлода рўйхатга олинган.

Forbes очиқ маълумотларга таяниб, M-DLBR борт рақамли вертолётнинг 13 ноябрда Le Kastelleda учганини, борт рақами М-DLBА бўлган Eurocopter EC-155 эса 1 март куни Монте-Карлода парвозни амалга оширганини аниқлаган. Иккала машина ҳам Мен оролида рўйхатдан ўтказилган (Британия коронасининг юрисдиксияси), аммо 3 март куни уларнинг регистрацияси бекор қилинган. Бу ҳаво кемасининг бир йиллик учиш сертификатидан маҳрум бўлиши ва қайтадан рўйхатга олингунига қадар парвоз қила олмаслигини англатади.

M-DLBR вертолёти Кайман оролларида Crystal Sky Limited компанияси томонидан, М-DLBА вертолёти эса ўша оролнинг ўзида— Margaux Aviation Limited томонидан рўйхатдан ўтказилган.

Алишер Усмоновнинг вакили «РБК»га бизнесмен мол-мулкининг катта қисми анчадан бери фаолияти яширин бўлмаган трастлар ихтиёрига ўтказилгани ва уларни миллиардернинг ўзи бошқармаслигини маълум қилган.

«Вертолётлар ҳам Алишер Усмоновга тегишли эмас», — дея қўшимча қилган «РБК» суҳбатдоши.

Аввал Усмоновга тегишли Дилбар яхтаси хатловга олинганди. Яхтанинг узунлиги 156 метр, кемада иккита вертолёт қўниш майдончалари мавжуд. 2016 йилда Yacht Harbour нашри Дилбаръни дунёдаги энг сиғимдор яхта деб топган.

Март бошида Германия ҳукумати ЕИ Алишер Усмоновга нисбатан санкция қўллаганидан сўнг Дилбаръга тақиқ қўйган, дейилади Forbes хабарида. Кема Ҳамбургдаги қайта жиҳозлаш корхонасида сақланаётганди.

Алишер Усмонов 28 февралда ЕИ санкцияларига учраган. У «Metaллоинвест» ва «МегаФон» тегишли бўлган USM Holdings корпорациясининг асосчиси ва асосий аксионери (49 фоиз) ҳисобланади.

Европадаги амалдорлар Усмоновга нисбатан тақиқлар унинг Россия президенти Владимир Путин билан муносабатлари яқинлиги туфайли қўлланилганини билдирган. Шунингдек, ҳужжатда Усмоновнинг Украинадаги уруш сиёсатини фаол қўллаб-қувватлаётгани қайд этилган.