Буюк Британия учта компаниянинг активларини Россия Украинада бошлаган ҳарбий операцияларга қарши навбатдаги санкциялар доирасида музлатиб қўйди. Бу ҳақда Буюк Британия ҳукумати санкциялар рўйхатининг янгиланган маълумотларида қайд этилган.
Лондондаги Photon Pro ва Majory компаниялари, шунингдек, марказий офиси Эдинбургда жойлашган Djeco Group’га нисбатан чекловлар ўрнатилган. Ҳужжатга кўра ушбу фирмаларнинг барчаси Россияда Украинадаги вазиятни беқарорлаштириш, мамлакатнинг ҳудудий яхлитлиги, суверенитети ва мустақиллигига нисбатан таҳдидлар пайдо қилишдаги иштироки туфайли «қора рўйхат»га киритилган.
Photon Pro раҳбариятида россиялик Наталия Дегтяр ва Евгений Гринин киради, Majory’ни эса россиялик Алексей Круговов ҳамда Андрей Захаров бошқаради. Djeco Group компанияси акцияларининг 75 фоизлик улуши малталик тадбиркор аёл Евгения Берновага тегишли.
Аввалроқ Британиянинг россиялик бизнесменлар ва Донбасс республикаларига қарши янги санкцияларни жорий қилмоқчилиги, шунингдек, Япония Россияга қарши янги санкциялар киритгани ҳақида хабарлар берилган. Хитой ташқи ишлар вазири Россияга қарши санкцияларни номақбул ҳаракат деб атаган.
Буюк Британия Россияга қарши санкциялар рўйхатини охирги марта 24 март куни кенгайтирган. Шу куни Россиядан жами 59 нафар шахс ва ташкилот, шунингдек Беларусдан олти нафар шахс қора рўйхатга киритилган. «Сбербанк» раҳбари Герман Греф, «Тинкофф» банки асосчиси Олег Тинков, шу билан бирга «Газпромбанк», «Альфа-банк», «Россия темир йўллари», «АЛРОСА» ва «РусГидро»га нисбатан санкциялар қўлланилган.
Изоҳ (0)