КХДР етакчиси Ким Чен Ин тинчликни таъминлаш ва таҳдидларга қарши туриш учун мудофаа соҳасини ривожлантириш зарурлигини маълум қилди. Бу ҳақда Шимолий Кореянинг «Нодон синмун» газетаси хабар берди.
Унинг таъкидлашича, фақат кенг кўламли ҳужум имкониятлари ҳимояни таъминлаш қобилиятига эга. Давлат раҳбари бундан кейин ҳам ҳужум уюштиришга мўлжалланган қуролланишни ривожлантиришга, янада кучли воситаларини яратиш ва улар билан армияни таъминлашга ваъда берган.
Ким Чен Ин 25 март куни Hwasong-17 қитъалараро янги баллистик ракетанинг учирилишида иштирок этган мудофаа саноати мутахассислари, олимлар, муҳандислар ва бошқа ходимлар билан учрашган. 25 март куни КХДР ракета давлат раҳбарининг шахсий назорати остида муваффақиятли синовдан ўтказилганини маълум қилди. Ракета Пхеньян аэропортидан учирилган. Парвознинг максимал баландлиги 6248,5 километр, узоқлиги — 1090 километр.
Yonhap агентлигининг ёзишича, 2022 йил бошидан буён бу КХДРнинг 12 маротаба ракета учириши ҳисобланади. Бунга қадар Сеуэл КХДР Сариқ денгиз томон тўртта реактив залп ўт очиш тизимларидан ўт очганини маълум қилганди.
Аввалроқ Шимолий Корея минтақадаги АҚШ ҳарбийлари ҳамда уларнинг «вассал кучлари»ни кузатиш ва уларга оид маълумотларни тўплаш мақсадида сунъий йўлдош яратиши маълум бўлганди.
Январь ойида АҚШ Шимолий Корея ракеталарини учириш частотаси ортиб бораётгани сабабли Бирлашган Миллатлар Ташкилоти орқали янги санкциялар жорий этишни таклиф қилганди, чунки ҳар бир учириш Хавфсизлик Кенгаши резолюцияларини бузади. Бундай санкциялар биринчи марта 2006 йилда киритилган. Улар Шимолий Кореяга ракеталар, материаллар ва уларни ишлаб чиқариш учун зарур технологияларни олиб кириш ва олиб чиқишни тақиқлашни назарда тутган. Кейинчалик чора-тадбирлар комплекси кенгайтирилган.
Изоҳ (0)