Хитойнинг Шанхай шаҳрида коронавирусининг авж олиши фонида, 28 март, душанба кунидан сўнгги икки йилдаги энг йирик локдаун жорий қилинди. Бу ҳақда Associated Press хабар берди.
Шанхайдаги локдаун икки босқичга бўлинади ҳамда 2019 йилда коронавирус илк бор аниқланган Ухандаги карантиндан кейинги энг интенсив локдаун бўлади. Биринчи босқичда Шанхайнинг Пудун иқтисодий тумани ва унинг атрофидаги ҳудудлар душанбадан жумагача ёпилади. Иккинчи босқич 1 апрель, жума куни бошланади — унда Хуанпу дарёсининг ғарбий қисмидан то Шанхайнинг марказий қисмигача локдаунга ёпилади.
Ушбу даврларда аҳолидан уйда қолиш талаб қилинади, ўта зарур аҳамиятга эга бўлмаган офислар ва корхоналар ёпилади, жамоат транспорти ҳаракати тўхтатилади. Шунингдек, локдаун пайтида шаҳар COVID-19 учун оммавий тестдан ўтказилади.
Ўтган ҳафтадаёқ шаҳарнинг кўплаб жамоалари коронавирусга чалиниш авж олгани сабабли локдаунга ёпилганди. Шунингдек, Шанхай расмийлари маҳаллий Диснейлендни жамоатчиликка ёпди, Шаҳардаги Tesla заводида ҳам ишлаб чиқариш тўхтатилмоқда.
27 март куни Шанхайда 3500 га яқин одамнинг коронавирус тести мусбат чиққан, улардан атиги 50 нафарида COVID-19 аломатлари аниқланган. Хитойда вирус аломатларсиз қайд этилган ҳолатлар тасдиқланган ҳолатлар ҳисобланмайди. Шу куни бутун мамлакат бўйлаб жами 1,2 мингга яқин касалланиш ва 5 мингга яқин симптомсиз ҳолатлар аниқланган.
Хитой COVID-19 га нисбатан «нол бардошлик» сиёсатига эга бўлган дунёдаги кам сонли давлатлардан бири бўлиб қолмоқда. Бу вирус тарқалишини қатъий локдаун ва касалланган фуқаролар билан алоқада бўлганлар учун мажбурий карантин орқали чеклашни англатади. Бу сиёсат Пекинда 2022 йил 4—20 февраль кунлари бўлиб ўтган 24-қишки Олимпия ўйинларига тайёргарликнинг бир қисми сифатида бошланди, бироқ расмийлар уни ўйинлар тугаганидан кейин ҳам давом эттиришга қарор қилди.
Хитойда пандемиянинг бутун даври давомида 144,5 мингга яқин одамда коронавирус аниқланган ва касаллик оқибатларидан 4,6 мингга яқин бемор вафот этган.
Изоҳ (0)