Россияда Meta компанияси «экстремистик ташкилот» сифатида тан олинганига қарамай, россияликларнинг ушбу компанияга тегишли Facebook ва Instagram ижтимоий тармоқларидан фойдаланиши қоидабузарлик ҳисобланмайди. Бу ҳақда Москвадаги Тверь туман суди қарорининг 28 март куни эълон қилинган асословчи қисмида айтилади.
Қарорда айтилишича, Meta фаолияти фақат «Россия Федерацияси фуқароларига қарши зўравон экстремистик ҳаракатларга чақириқларни ўз ичига олган ва конституциявий тузум асосларини ўзгартиришга қаратилган материалларни жойлаштириш, тарқатиш ва блоклаш чораларини кўрмаслик нуқтаи назаридан» экстремистик деб тан олинган.
Meta’ни «экстремистик ташкилот» деб тан олиш ва унинг Россияда фаолиятини тақиқлаш ҳақидаги қарор 21 март куни қабул қилинган. Мамлакатда Facebook ва Instagram тармоқлари блокланди. Аммо чекловлар Meta компаниясига тегишли бўлган WhatsApp мессенжерига таъсир қилмади.
Meta’ни «экстремистик ташкилот» деб топишни Россия Бош прокуратураси талаб қилган, сабаби компания Facebook ҳамда Instagram’да айрим мамлакатларнинг россиялик ҳарбийларга нисбатан таҳдидлари ва чорловларини ўчиришни рад қилган, шунингдек, Владимир Путин ва Александр Лукашенкога нисбатан ўлим тилакларини ҳам ўчирмаган (14 мартда Meta президентларга нисбатан ўлим тилагини ёзиб пост қолдиришни тақиқлаганди).
Изоҳ (0)