Клинт Маларчукнинг «Вашингтон Кепиталз»дан «Баффало Сейбрз»га ўтиши асли украиналик бўлган канадалик дарвозабоннинг фаолиятида бурилиш ясаши керак эди. Алберта штатида туғилган посбон узоқ вақт давомида «Кепиталз»нинг учинчи дарвозабони бўлиб келганди, «Сейбрз»да эса голкиперларнинг жароҳати туфайли истиқболли Маларчукка эътибор қаратилди. Янги жойда Клинт ўзини кўрсата олди, беш ўйинда учта ғалаба қозониб, NXЛ клубининг тўлақонли биринчи рақамига айланишга тайёрлигини билдирди.
Аммо клубини алмаштирганидан икки ҳафта ўтиб, Маларчукни ҳаётидаги энг жиддий синов кутиб турган эди: 1989 йилнинг 22 мартида «Сент-Луис»га қарши ўйинда у муз устида вафот этиши мумкин эди.
Ўйин 1:0 ҳисобида «Баффало» фойдасига ҳал бўлаётганди, рақиблар Клинтнинг зонасига ўтди. «Блюз» ўйинчиси бурчакдан шайбани етказди, Уве Крупп ва Стив Таттл ўртасида шайба учун кураш кечди. Иккинчиси йиқилди, конкининг тиғи рақиб дарвозабони томоғини кесиб юборди.
«Бу ниқобимга урилган зарбага ўхшади. Оғриқ йўқ эди, лекин шлемни ечдим ва қонни кўрдим. Атрофим қизариб кетган эди. Юрагимнинг ҳар бир зарбида қон оқиши кучайиб борарди. Бу артерия. Қонни тўхтатиш учун бўйнимни ушлаб олдим, аммо у бармоқларим орасидан отилиб чиқарди. Қон оқишда давом этарди. Олдинга йиқилдим ва у фаввора сингари отиларди», — деб ёзади Клинт ўз китобида.
15 сантиметрли кесилган жойдан қора қон отилиб чиқарди, бир неча сония ичида посбоннинг атрофини қонга тўлди.
«Томоғи кесилган одам уч дақиқадан ортиқ яшай олмаслигини билардим. Шунинг учун имкон қадар тезроқ трибуна остига ўтишни хоҳлардим, чунки онам бу ўйинни телевизор орқали томоша қилаётганди. У ўғлининг қандай ўлаётганини кўрмаслиги керак», — тан олади Клинт.
«Сент-Луис» ҳужумчиси Рик Мигер бу ҳолатда ўзини йўқотмади ва ёрдам сўраб бақира бошлади. Учрашув ҳаками Терри Грегсон Клинтнинг ёнига борганда ўйинчининг хотирлашича, унинг кўзи соққасидан чиқиб кетгудек бўлган. Грегсон фақат қичқира олди: «замбилни олиб келинг, у қон йўқотяпти!».
Маларчукнинг ёнида биринчи бўлиб «Баффало» физиотерапевти Жим Пиццутелли пайдо бўлди. Айнан у томоғига дока босиб, зўрға нафас олаётган Клинтнинг ҳаётини сақлаб қолди. Аммо мато дарҳол қонга беланди. Жабрланувчи йўталиб, пичирларди: «Жим, бу уйқу артерияси». Шифокор унга хотиржам ва сокинлик билан: «Шунчаки айтганимни қил», — деди.
Бу даҳшатли воқеага гувоҳ бўлган 11 мухлис ҳушини йўқотди, икки нафари юрак хуружига учради, уч хоккейчи муз устида қайт қилиб юборди. У ерда хотиржамликни сақлаб, Клинтнинг ҳаётини сақлаб қолишда асосий ролни бажарган одам Пиццутелли эди. У захира ўриндиғидан Маларчукнинг ёнига етиб бориш учун қимматли 136 сониядан бор-йўғи 14 сонияни сарфлади.
Пиццутелли Вьетнам уруши фахрийси бўлиб, у ерга жанговар муҳандис сифатида борган. Фронтга борганига икки ҳафта бўлган Жим ва яна тўрт нафар аскар қишлоқ бўйлаб юрганда, уларни юк машинаси уриб юборади. «Баффало»нинг бўлажак шифокори осон қутулди: ўша тўқнашувда унинг бир нечта қовурғаси синди, холос. Аскарлардан бири жарликка қулаб кетди. Қолган иккиси ҳам тиббий ёрдамга муҳтож эди. Шундан сўнг Жим спорт тиббиётини ўрганишга қарор қилди ва бир мунча вақтдан кейин инсон танаси ҳақида ҳамма нарсани ўрганди. Олинган билимлар ўша оқшомда Маларчукнинг ҳаётини сақлаб қолди.
Жим қон оқаётган томирни сиқиб тура олди ва унга кийим алмаштириш хонасигача етиб боришга ёрдам берди.
«Шифокорлар сочиқни олди ва бор оғирлиги билан томоғимни босди. Баъзида нафас олишим учун қўлларини бўшатарди, лекин қон ҳам оқишни бошларди, шунинг учун барчаси қайта-қайта такрорланарди», — дейди Маларчук.
https://www.instagram.com/p/CL7x9GtAaNI/?utm_source=ig_embed&ig_rid=c72664de-ede8-4e0a-86e0-2ad19e239d99
Клинт бир нечта сабабларга кўра омадли эди:
- «Баффало» стадиони шундай лойиҳаланган эдики, кийиниш хонасига йўл захира ўриндиғи (майдоннинг ёни) томонда эмас, айнан дарвозалар ортида жойлашганди, шунинг учун посбон музни тезда тарк этди;
- Маларчук ўша вақтда чиқишга энг яқин дарвозани ҳимоя қилаётган эди. Акс ҳолда, у қимматбаҳо сонияларини йўқотиб, вафот этиши мумкин эди.
Касалхонагача бўлган йўлда Пиццутелли шикастланган артерияни сиқиб, қон кетишини тўхтатишга ҳаракат қилди. Маларчук касалхонага хоккей формасида олиб борилди, унинг кийимларини ечишга вақт йўқ эди. Клинтни қутқариш учун тезкор операция бошланди.
Шифокорлар «Баффало» посбони ҳаётини қутқариш учун курашаётган бир паллада, ушбу даҳшатли ўйин иштирокчилари ҳайратда қолган эди. Жабрланувчининг яқин дўсти Грант Ледярд ўзини қўярга жой тополмаётганди: у уёқдан буёққа юрарди, «Сейбрз» кийиниш хонасида йиғлаб юборди.
Иккала жамоада ҳам учрашувни давом эттириш учун хоҳиш йўқ эди. Бироқ Маларчукнинг ҳаёти хавф остида эмаслиги хабар қилинганидан сўнг ўйин давом эттирилди. «Баффало»нинг захира дарвозабони Жак Клотенинг ҳис-туйғуларини тасаввур этиб бўлмайди, у бироз олдин жамоадошининг қони тўкилган жойда дарвозани ҳимоя қилишга мажбур бўлганди.
«Ўзим билан фахрланаман. Таслим бўлмадим ва кўзларимни юммадим. Қандай кесилган эди... Шулардан кейин ҳам мен ваҳимага тушмадим. Яшаб қолиш учун ҳамма нарсани қилдим», — дейди Клинт.
https://www.instagram.com/p/B31fhrepg27/?utm_source=ig_embed&ig_rid=d37f88c3-fb00-481f-b693-c0b46b8a505d
Дарвозабонни қутқариш операцияси деярли бир ярим соат давом этди. Хоккейчи 1/3 қисм қонидан (1,5 литр) айрилганди. Маларчукнинг бўйнига 300 га яқин чок тушди: агар Таттлнинг конкиси 3 миллиметр юқорироқ кўтарилганда, Клинтнинг ўлими муқаррар эди. Унга омад кулиб боқди, операциянинг эртасигаёқ Маларчук шифохонадан чиқди ва уйига йўл олди.
Шу воқеадан кейин NXЛ дарвозабонлар учун янги ҳимоя элементини киритди.
Бир қарашда, хоккей тарихидаги энг даҳшатли жароҳат ҳақидаги воқеа бахтли якун топди. Бироқ, Маларчук бошидан ўтказган воқеалардан сўнг бутун ҳаёти давомида руҳий муаммоларга дуч келди. Клинт узоқ вақт тунги даҳшатлардан азоб чекарди ва кутилмаганда соғлиғида жиддий муаммолар бўлиши мумкинлиги ҳақидаги ўйлар тинчлик бермасди.
У хоккейга қайтди, лекин доимий қўрқув ва ваҳима туфайли ўз салоҳиятини тўла намоён эта олмади. Бироқ, «Агар Стив Таттлнинг конкиси 3 миллиметр баландроққа тегса нима бўларди?», деган савол «Баффало»нинг собиқ дарвозабонига хотиржамлик ва ҳаммаси ёмонроқ тугаши мумкинлигини тушуниш имконини беради.
Изоҳ (0)