Зеленский Украина яхлитлигини қайта тиклаш вақти келганини маълум қилди

Президент Владимир Зеленский Украина ҳудудий яхлитлигини қайта тиклаш вақти келгани, энди учрашиб, гаплашиш кераклигини маълум қилди. Бу ҳақда давлат раҳбарининг видеомурожаатида сўз боради.

«Учрашув вақти келди. Гаплашиш вақти. Украина учун ҳудудий яхлитлик ва адолатни қайта тиклаш вақти келди», — дейди у.

Зеленский шу орқали Москва ва Киев ўртасидаги дастлабки музокаралар якунини изоҳлаган.

Февраль охиридан буён Украина ва Россия ўртасида тўрт раундли музокаралар бўлиб ўтди. Уларнинг учтаси — 28 февраль, 3- ва 7 март кунлари Беларусда юзма-юз ўтказилган бўлса, 15 мартдагиси онлайн-конференция форматида бўлиб ўтди.

Олдинроқ музокаралар бўйича Россия томони делегацияси раҳбари Владимир Мединский Киев ва Москва музокараларнинг асосий банди — Украинанинг нейтрал мақоми ва НАТОга қўшилмаслик масаласи бўйича «максимал даражада позициясини яқинлаштириш»га муваффақ бўлганини маълум қилганди. Шундан сўнг, у Украина хавфсизлик кафолатлари билан боғлиқ «нюанслар бошланаётганини» таъкидлаган.

Шу билан бирга, Мединский келишув матнини икки давлат раҳбарлари тасдиқлашидан олдин Россия президенти Владимир Путиннинг Зеленский билан учрашувини муҳокама қилишдан бош тортган. Унинг айтишича, ҳужжат матни аввал тайёрланиши ва музокара томонлари билан келишилиши керак. Шундан кейин ТИВ раҳбалари уни имзолаши ва аҳдлашувчи давлат ҳукуматлари томонидан тасдиқланиши лозим.

Аввал Зеленский барча украиналикларга қуролдан фойдаланишга рухсат берувчи қонунни имзолагани, шунингдек, Украина Қрим ва Донбасс келажаги борасида музокаралар олиб бориш ва ўзаро келишувга эришиш учун ҳаракат қилишга тайёрлигини маълум қилгани ҳақида хабарлар берилган. Ундан олдин Зеленский Илон Маск билан суҳбатлашиб, дунёнинг энг бой одамига Украинани қўллаб-қувватлаётгани учун миннатдорлик билдирганди.