Австралия ва Япония Россияга қарши санкцияларни кенгайтирди. Янги Зеландия Путинга нисбатан чекловлар жорий қилди

Австралия ҳукумати россиялик миллиардерлар Олег Дерипаска ва Виктор Векселбергга, шунингдек, Россиядаги 11 та банк ва давлат идораларига қарши санкциялар жорий қилди. Бу ҳақда Австралия ташқи ишлар вазирлигига таяниб, Meduza хабар берди.

Хусусан, «Сбербанк», «Газпромбанк», «ВЕБ», «ВТБ», «Росселхозбанк», «Совкомбанк», «Новикомбанк», «Алфа-Банк» ва Москва кредит банки Австралия санкциялари остида қолди.

Янги Зеландия эса янги санкцияларнинг биринчи босқичини эълон қилди. Янги Зеландияга бориш ва мамлакатдаги активларини музлатиш тўғрисидаги қарор Россия президенти Владимир Путин ва Россия Хавфсизлик кенгашининг 12 аъзосига ҳам тегишли. Чекловлар, шунингдек, 300 дан ортиқ сиёсатчилар, ҳарбийлар ва тарғиботчиларга, 19 та ташкилотга, жумладан, «Промсвязбанк»га ҳам таъсир кўрсатади.

Япония ҳукумати Россияга қарши санкциялар рўйхатига 9 та ташкилот ва 15 нафар россияликни киритди. Жумладан, Россия Ташқи ишлар вазирлиги матбуот котиби Мария Захарова ва сенатор Сулаймон Керимов Япония санкцияларига тушди.