Қўшма Штатлар Пентагоннинг Украина ҳудудидаги ҳарбий-биологик фаоллигига оид маълумотларни ошкор этиши керак. Бу ҳақда Россиянинг АҚШдаги элчихонаси ўзининг Telegram’даги канали орқали маълум қилди.
«Америка томонидан максимал даражада қисқа муддат ичида Украина ҳудудида жойлашган лабораториялардаги ҳарбий-биологик фаолликка оид маълумотларни ошкор этишини талаб қиламиз. Барча ишлар ортида Пентагон турган бўлса, қандай қилиб тинч тадқиқотлар ҳақида гап бўлиши мумкин?», — дейилади хабарда.
Дипломатларнинг таъкидлашича, Американинг Россия кимёвий қуролларни тақиқлаш тўғрисидаги конвенцияни бузганлик ҳақидаги айбловлари ва даъволари жиддий дош бермайди. Шу билан бирга, АҚШнинг ўзи ҳозирга қадар «жанговар заҳарловчи воситалар миллий захирасини» йўқ қилмаган.
Элчихона вакилларининг сўзларига кўра, Россияга «Украина радикал гуруҳлари АҚШ разведка хизматлари назорати остида тинч аҳолига қарши заҳарли кимёвий моддаларни қўллаш бўйича бир нечта эҳтимолий сценарийларни тайёрлагани тўғрисида маълум». Дипломатларнинг маълум қилишича, биолабораторияларни ривожлантиришга жами 32 миллион доллар йўналтирилган.
16 март куни Россия президенти Владимир Путин Украинада бевосита Россия чегараси яқинида биологик қурол компонентлари яратилганини маълум қилганди. Унинг сўзларига кўра, Пентагон раҳбарлиги ва молиявий кўмагида ўнлаб лабораториялар тармоғи «ҳарбий-биологик дастурлар, жумладан, коронавирус, Сибир куйдиргиси, Африка чўчқа ўлати ва бошқа ҳалокатли касалликлар намуналари билан тажрибалар ўтказган».
Олдинроқ Россия Мудофаа вазирлиги Украинада биологик қурол компонентларини яратилаётгани айтилган ҳужжатларни эълон қилганди. Идора расмий вакили генерал майор Игорь Конашенковнинг сўзларига кўра, шундан сўнг, «Украина Соғлиқни сақлаш вазирлиги барча биолабораторияларга хавфли патогенлар сақланадиган захираларини зудлик билан йўқ қилиш бўйича кўрсатма юборган».
АҚШ давлат котиби ўринбосари Виктория Нуланд Сенатдаги эшитувда Украинада биологик тадқиқот объектлари бўлганини тасдиқлаган. У мазкур тадқиқотлар ҳақида ҳеч қандай батафсил маълумотларни келтирмаган. Пентагон ва Оқ уй эса бу маълумотларни рад этган. БМТ Украинада ишлаган ЖССТ ходимларининг бундай тадқиқотларда хабари йўқлигини маълум қилган.
Изоҳ (0)