Россия президенти матбуот котиби Дмитрий Песков Владимир Путинни «қонли диктатор ва ҳақиқий каллакесар» деб атаган АҚШ президенти Жо Байденга кескин баҳо бермаслигини айтди. Бу ҳақда Кремль вакили журналистлар учун ўтказилган брифингда гапириб ўтди.
Биз президент Путинга нисбатан шахсий ҳақоратни ўз ичига олган баёнотларни эшитиб, кўриб келяпмиз. Жаноб Байденнинг бундай асабийлиги, чарчаши, баъзан унутувчан бўлиб қолиши, булар эса охир-оқибат агрессив баёнотларга олиб келишини ҳисобга олсак, янада кўпроқ агрессия келтириб чиқармаслик учун, фикримча, биз унга ҳеч қандай кескин баҳо бермаймиз, — деди Песков.17 март куни Жо Байден Владимир Путинни «қонли диктатор ва Украина халқига қарши ахлоқсиз уруш олиб бораётган ҳақиқий каллакесар» деб атади. Ундан аввал, 16 март куни эса Байден Россия президентини ҳарбий жиноятчи деб атаганди. Дмитрий Песков АҚШ давлат раҳбарининг «Путинни ҳарбий жиноятчи» деб атаган баёноти «ўринсиз ва кечириб бўлмайдиган нутқдан» бошқа нарса эмаслигини айтган.
Эслатиб ўтамиз, бир йил олдин Байден Путинни «қотил деб ҳисоблайсизми?» деган саволга ижобий жавоб берганди.
Изоҳ (0)