Ижтимоий тармоқларда бир неча кундан буён давом этаётган ёғингарчилик оқибатида Тошкент метрополитени станциясига сув сизиб ўтгани тасвирланган видео пайдо бўлди. Метрополитен маъмурияти мазкур ҳолатга муносабат билдирди.
Видеодаги ҳолат «Беруний» метро станциясида тасвирга олингани айтилмоқда. Кадрлардан кўриш мумкинки, сув томаётган жойларга елим идишлар қўйиб чиқилган.
Маълум қилинишича, юз бераётган ҳодиса оқибатида метрополитен масъул ходимлари ҳамда мутасадди ташкилот вакиллари томонидан ўрганиш ишлари олиб борилган.
«Тинимсиз ёғаётган ёмғир ҳамда намгарчилик оқибатида ер ости ва ер усти қисмларида таъмирлаш ишларини амалга ошириш мумкин эмас. Шунингдек, кунлар исиши билан ушбу таъмир ишлари бошланиши мумкин», — дейилади муносабатда.
Шунингдек, Тошкент метрополитени барча фуқаролардан ушбу вазиятни нотўғри талқин қилмасликни сўраган.
Аввалроқ ёғингарчилик Пискент ва Юқори Чирчиқ туманларидаги кўприкларга зарар етказгани, кучли ёмғирдан сўнг сув Тошкент ва Самарқанд вилояти кўчаларини сув босгани тўғрисида хабар берилганди. «Ўзгидромет» хабарига кўра, 17—20 март кунлари Ўзбекистон ҳудудига Эрондан илиқ ва нам ҳаво, сўнгра Волгабўйи ҳудудларидан совуқ ҳаво массаси кириб келиши кутилмоқда. Кучли ёмғирлар сабабли Ўзбекистоннинг 9 та вилоятида сел келиш хавфи эълон қилинган.
Изоҳ (0)