Sirdaryo tumanidagi shaharchani odamlarni xavfsiz joyga evakuatsiya qilish darajasida suv bosdi (video)
Sirdaryo tumanidagi xo‘jaliklararo kollektorning Baxt shaharchasi hududidan oqib o‘tuvchi qismida suv sathining me’yoridan oshib ketishi oqibatida xonadonlarga suv toshib kirdi, deb xabar beradi FVV matbuot xizmati.
Ma’lum qilinishicha, surunkali yog‘ingarchiliklar tufayli Sirdaryo viloyati Sirdaryo tumanidagi xo‘jaliklararo kollektorning Baxt shaharchasi hududidan oqib o‘tuvchi qismida suv sathining me’yoridan oshib ketgan. Oqibatda qishloq xo‘jaligining shudgor yerlariga, mahallalar va aholi yashash xonadonlariga, xususan, Baxt shahri “Xazina” MFYning Xamiyatli ko‘chasida 21 ta, Tarovatli ko‘chasida 7 ta, Ulug‘ yo‘l ko‘chasida 35 ta, Peshqadam ko‘chasida 12 ta, Yangi qurilish ko‘chasida 27 ta xonadonga suv kirgan.
Zudlik bilan vaziyat oqibatlarini bartaraf etish maqsadida Baxt shahri IIBda tezkor shtab tashkil etilib, tuman hokimligi, FVB, IIB, Milliy gvardiya xodimlari va mahalla vakillaridan iborat 3 ta ishchi guruh tuzilgan. Ishchi guruh tomonidan suv toshgan xonadonlar aholisini xavfsiz hududlarga ko‘chirish haqida ogohlantirish xatlari berilib, “Xazina” MFYdan 20 ta xonadonda yashovchi 68 nafar fuqaro vaqtinchalik yaqin qarindoshlari xonadonlariga ko‘chirilgan. Ko‘chirilgan aholi uchun tibbiy va boshqa ta’minot tadbirlari tashkil etilgan.
Yuzaga kelgan suv toshish oqibatlarini bartaraf etish uchun viloyat Favqulodda vaziyatlar boshqarmasi, “Avtoyo‘l” xizmati, Suv xo‘jaligi vazirligi viloyat tuzilmalari kuch va vositalari jalb qilingan.
Shuningdek, voqea joyiga Favqulodda vaziyatlar vaziri boshchiligida Maxsus vazifalar bo‘yicha respublika qutqaruv markazidan qutqaruvchilar yetib borgan. Jizzax va Toshkent viloyatlari FVBlaridan qo‘shimcha kuch va vositalar safarbar etilib, hozirda suvni chiqarish ishlari olib borilmoqda.
Favqulodda vaziyatlar vaziri general-mayor Abdulla Qo‘ldoshev viloyatga yetib borgan bo‘lib, ayni vaqtda uning boshchiligida kuchli yog‘ingarchilik oqibatlarini bartaraf etish ishlar amalga oshirilyapti.
