Ijtimoiy tarmoqlarda bir necha kundan buyon davom etayotgan yog‘ingarchilik oqibatida Toshkent metropoliteni stansiyasiga suv sizib o‘tgani tasvirlangan video paydo bo‘ldi. Metropoliten ma’muriyati mazkur holatga munosabat bildirdi.
Videodagi holat “Beruniy” metro stansiyasida tasvirga olingani aytilmoqda. Kadrlardan ko‘rish mumkinki, suv tomayotgan joylarga yelim idishlar qo‘yib chiqilgan.
Ma’lum qilinishicha, yuz berayotgan hodisa oqibatida metropoliten mas’ul xodimlari hamda mutasaddi tashkilot vakillari tomonidan o‘rganish ishlari olib borilgan.
“Tinimsiz yog‘ayotgan yomg‘ir hamda namgarchilik oqibatida yer osti va yer usti qismlarida ta’mirlash ishlarini amalga oshirish mumkin emas. Shuningdek, kunlar isishi bilan ushbu ta’mir ishlari boshlanishi mumkin”, — deyiladi munosabatda.
Shuningdek, Toshkent metropoliteni barcha fuqarolardan ushbu vaziyatni noto‘g‘ri talqin qilmaslikni so‘ragan.
Avvalroq yog‘ingarchilik Piskent va Yuqori Chirchiq tumanlaridagi ko‘priklarga zarar yetkazgani, kuchli yomg‘irdan so‘ng suv Toshkent va Samarqand viloyati ko‘chalarini suv bosgani to‘g‘risida xabar berilgandi. “O‘zgidromet” xabariga ko‘ra, 17—20-mart kunlari O‘zbekiston hududiga Erondan iliq va nam havo, so‘ngra Volgabo‘yi hududlaridan sovuq havo massasi kirib kelishi kutilmoqda. Kuchli yomg‘irlar sababli O‘zbekistonning 9 ta viloyatida sel kelish xavfi e’lon qilingan.
Izoh (0)