Соғлиқни сақлаш вазирлигининг маълум қилишича, 2022 йилнинг январь–февраль ойларида Республика тез тиббий ёрдам хизматига келиб тушган 31 296 та мурожаат асоссиз деб баҳоланган бўлиб, уларнинг 922 таси ёлғон чақириқ бўлган.
«Барчамиз иссиқ жонмиз. Вақт-бевақт тобимиз қочиб қолса, дарров тез ёрдамга мурожаат қиламиз. Аммо баъзида 103 хизмати ходимларининг белгиланган манзилга ўз вақтида етиб бора олмаслик ҳолатлари кузатилади. Бунга эса кўпинча асоссиз ва ёлғон чақириқлар сабаб бўлади», — дейилади вазирлик хабарида.
ССВ 922 таси ёлғон чақириқ 2021 йилнинг шу даврига нисбатан қарийб 18 та кам кўрсаткич бўлса-да, бундай мурожаатлар сабабли инсонлар ҳаёти хавф остида қолишини инобатга олса, уларнинг биттаси ҳам кўплигини қайд этган.
Энг кўп ёлғон чақириқ Тошкент вилоятида қайд этилган — 258 та. Қашқадарё вилоятида 124 та, Фарғона вилоятида 119 та, Тошкент шаҳрида 107 та, Навоий вилоятида эса 102 та шундай мурожаат келиб тушган.
Энг кам ёлғон чақириқ Жиззах вилояти (2 та), Қорақалпоғистон Республикаси (11 та) ва Сирдарё вилоятида (15 та) қайд этилган.
Бундан ташқари, январь—февраль ойларида тез ёрдам ходимлари томонидан яна бир қанча мурожаат натижасиз чақириқ, деб баҳоланган. Жумладан, 1401 та ҳолатда манзил топилмаган, 11 минг 692 та вазиятда тез тиббий ёрдам рад этилган, 2 598 та ҳолатда бемор ўз жойида бўлмаган, 5 692 тасида бошқа транспорт воситасида олиб кетилган, 339 тасида эса тез ёрдам ходимларига эшик очилмаган.
Маълумот учун, 2021 йилда Ўзбекистонда тез ёрдам хизматига жами 194 96 та асоссиз чақириқ келиб тушган.
Изоҳ (0)