Бухоро вилоятининг Ғиждувон туманида хотинини қасддан ўлдирган эр 13 йилга қамалди. Бу ҳақда «Дарё»га Жиноят ишлари бўйича Вобкент тумани суди раиси Акром Раҳимов маълум қилди.
Суд ҳужжатларига кўра, воқеа 2021 йилнинг 27 ноябрь куни соат 10:30 да содир бўлган.
Ғиждувон туманининг «Зарангари» маҳалласи Калон қишлоғида яшовчи 46 ёшли З.Р. воқеадан бир кун илгари, яъни 26 ноябрь куни укаси К.Р.нинг туғилган кунига бора олмагани учун 27 ноябрь тонгида унинг хонадонига борган. Меҳмон ва мезбон спиртли ичимлик истеъмол қилган. Маст ҳолда уйига қайтган ва турмуш ўртоғи B.Р. билан ўзаро келишмовчилик сабаб жанжаллашиб қолган З.Р. ўғлини ҳовлидаги ерни ағдариш учун, қизини эса дўкондан сигарет олиб келиш учун уйдан чиқариб юборган. Фарзандлари чиқиб кетгач З.Р. ошхонада турган ароқни ичиб, хотинидан ҳам уйдан чиқиб кетишни талаб қилган. Уни ёқтирмаслигини, бирга яшаш истаги йўқлигини, чиқиб кетмаса, уни ўлдиришини айтган. Аёл эса жаҳл устида эрини сенсираб, ҳеч қаерга кетмаслигини, унга уйдан ўзи чиқиб кетиши кераклигини айтган.
Эр эса унга «Икки марта қамалиб чиққанман. Сени ҳам ўлдираман ва сендан қутуламан. Узоғи билан тўрт-беш йил қамоқда ўтириб, яна қайтиб чиқаман», дея хотинининг чап томон кўкрак қисмига пичоқ билан уриб, уни ўлдирган.
«Аввалига хотинимнинг ўлганини билмадим. Фарзандларимни бақириб чақирдим. Оналарини пичоқлаб қўйганимни, зудлик билан тез ёрдам ва ИИБ ходимларига қўнғироқ қилишларини сўрадим. Афсуски, кеч бўлган экан», — дейди судда сўз олган айбланувчи.
Судда қайд этилишича, хотинини ўлдирган эр 2002 йил Жиноят кодексининг 164-моддаси (босқинчилик) билан айбланиб, 5 йил муддатга қамалган. 2016 йилда эса Жиноят кодексининг 270-моддаси (тақиқланган экинларни етиштириш) билан айланиб, бир йил муддатга ахлоқ тузатиш билан жазоланган.
Суд мажлисида сўз олган марҳуманинг онаси куёви қизини қасддан ўлдирганини, унга қонуний жазо берилиши лозимлигини сўраган.
Жиноят ишлари бўйича Вобкент туман суди ҳукмига кўра, айбланувчи З.Р. Жиноят кодексининг 97-моддаси 1-қисми (қасддан одам ўлдириш) билан айбли деб топилган ва унга 13 йил муддатга озодликдан маҳрум қилиш жазоси тайинланган.
Изоҳ (0)