Тошкент шаҳрида қимматбаҳо табиий тошни 220 минг долларга сотишга уринган шахслар ушланди, деб хабар беради Бош прокуратура ҳузуридаги департамент.
Маълум қилинишича, департамент ҳамда ДХХнинг Тошкент шаҳар бошқармалари томонидан тезкор тадбир ўтказилган. Тадбирда Ҳ.Х., М.С. исмли шахслар ва бошқалар олдиндан тил бириктириб, 1 дона (ҳақиқий баҳоси 30 миллион сўм бўлган) табиий тошни 220 минг долларга қонунга хилоф равишда сотган вақтида ашёвий далиллар билан ушланган. Шунингдек, улардан жами 4 та табиий тош ҳамда симоб моддаси ашёвий далил сифатида олинган.
Экспертиза хулосасига кўра, тошларнинг соф оғирлиги 333,8 граммни ташкил этиб, таркиби рубин, кварс, флюорит, гранат, пироп ва сапфир бирикмалардан иборат.
Мазкур ҳолат юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Навоийда радиоактив моддани 50 минг долларга сотишга уринган шахслар қўлга олингани тўғрисида хабар берилганди.
Изоҳ (0)