Ўзбекистоннинг 11 та ҳудудида сўнгги суткада коронавирус билан касалланиш ҳолатлари қайд этилмади

Ўзбекистонда 14 март куни 21 кишида коронавирус қайд этилиб, мамлакатда пандемия бошидан бери коронавирусга чалингани расман тасдиқланганлар сони 237 281 нафарга етди, деб хабар беради Соғлиқни сақлаш вазирлиги матбуот хизмати.

Янги касалланиш ҳолатларининг:

• 1 нафари Андижон вилоятида,
• 2 нафари Самарқанд вилоятида,
• 18 нафари Тошкент шаҳрида коронавирусга чалинган беморлар билан мулоқотда бўлгани сабабли намуна олинган фуқаролар орасида аниқланган.

Таъкидлаш керакки, Ўзбекистонда 2 февраль куни коронавирус билан кунлик касалланишлар сони 15 кун ичида илк бор 1000 тадан камайганди. 9 февралдан бошлаб мамлакатда коронавирус билан кунлик касалланишлар сони бир ой ичида илк бор 700 тадан камайди. Мамлакатда кунлик касалланиш бўйича 200 кишидан паст кўрсаткич сўнгги марта 18 февралда (191 киши), 100 кишидан паст кўрсаткич эса 28 февралда (96 киши) қайд этилганди. 7 март куни эса 27 кишида коронавирус тасдиқланган.

Сўнгги суткада 51 киши: Андижон вилоятида 5 нафар, Бухоро вилоятида 1 нафар, Самарқанд вилоятида 1 нафар, Фарғона вилоятида 4 нафар, Тошкент шаҳрида 40 нафар бемор тузалиб, касалликдан соғайганлар жами 234 720 нафарга етди ва соғайиш кўрсаткичи 98 фоизни ташкил этмоқда.

Шунингдек, ўтган бир сутка ичида икки кишида пневмония аниқланган.

Аввалроқ Россия коронавирус сабаб Ўзбекистон билан авиақатновларга киритилган чекловларни бекор қилгани, Ўзбекистон ва Туркия эмланганлик сертификатларини ўзаро тан олиш бўйича келишувга эришгани, Ўзбекистонга 2 млн дозага яқин Pfizer вакцинаси олиб келингани тўғрисида хабар берилганди.