Тошкент шаҳри Юнусобод туманида 12 март куни сотувчилар ва уларнинг оила аъзолари ўртасида жанжал содир бўлгани хабар қилинганди. Тергов департаменти ҳолат юзасидан қўшимча маълумот берди.
Қайд этилишича, шу куни соат 17:30 ларда Юнусобод тумани Марказ-4 даҳасидаги «Абдулла Қодирий» метро бекати олдида жойлашган дўконлардан биридаги сотувчи З.Н. (1999 йилда туғилган) собиқ сотувчиси М.Ф. (1999 йилда туғилган) билан кийим масаласида ўзаро гап талашиб қолган.
Уларнинг можаросига М.Ф.нинг онаси М.Ф. (1980 йилда туғилган) ва З.Н.нинг синглиси З.Д. (2003 йилда туғилган) аралашган, оқибатда бу можаро жанжалга айланиб кетган. Шу ерда бўлган Ғ.Л. (1998 йилда туғилган), B.О. (1973 йилда туғилган) уларни ажратишга ҳаракат қилган. Фуқаро М.Ф. енгил жароҳат олган.
Ҳолат юзасидан Жиноят кодекснинг 277-моддаси 3-қисми «г» банди ( жамоат тартибини сақлаш вазифасини бажариб турган ҳокимият вакили ёки жамоатчилик вакилига ёхуд безорилик ҳаракатларининг олдини олиш чорасини кўрган бошқа фуқароларга қаршилик кўрсатиб содир этилган безорилик) билан жиноят иши қўзғатилган. Ҳозирда тергов ҳаракатлари давом этмоқда.
Изоҳ (0)