O‘zbekistonning 11 ta hududida so‘nggi sutkada koronavirus bilan kasallanish holatlari qayd etilmadi

O‘zbekistonda 14-mart kuni 21 kishida koronavirus qayd etilib, mamlakatda pandemiya boshidan beri koronavirusga chalingani rasman tasdiqlanganlar soni 237 281 nafarga yetdi, deb xabar beradi Sog‘liqni saqlash vazirligi matbuot xizmati.

Yangi kasallanish holatlarining:

• 1 nafari Andijon viloyatida,
• 2 nafari Samarqand viloyatida,
• 18 nafari Toshkent shahrida koronavirusga chalingan bemorlar bilan muloqotda bo‘lgani sababli namuna olingan fuqarolar orasida aniqlangan.

Ta’kidlash kerakki, O‘zbekistonda 2-fevral kuni koronavirus bilan kunlik kasallanishlar soni 15 kun ichida ilk bor 1000 tadan kamaygandi. 9-fevraldan boshlab mamlakatda koronavirus bilan kunlik kasallanishlar soni bir oy ichida ilk bor 700 tadan kamaydi. Mamlakatda kunlik kasallanish bo‘yicha 200 kishidan past ko‘rsatkich so‘nggi marta 18-fevralda (191 kishi), 100 kishidan past ko‘rsatkich esa 28-fevralda (96 kishi) qayd etilgandi. 7-mart kuni esa 27 kishida koronavirus tasdiqlangan.

So‘nggi sutkada 51 kishi: Andijon viloyatida 5 nafar, Buxoro viloyatida 1 nafar, Samarqand viloyatida 1 nafar, Farg‘ona viloyatida 4 nafar, Toshkent shahrida 40 nafar bemor tuzalib, kasallikdan sog‘ayganlar jami 234 720 nafarga yetdi va sog‘ayish ko‘rsatkichi 98 foizni tashkil etmoqda.

Shuningdek, o‘tgan bir sutka ichida ikki kishida pnevmoniya aniqlangan.

Avvalroq Rossiya koronavirus sabab O‘zbekiston bilan aviaqatnovlarga kiritilgan cheklovlarni bekor qilgani, O‘zbekiston va Turkiya emlanganlik sertifikatlarini o‘zaro tan olish bo‘yicha kelishuvga erishgani, O‘zbekistonga 2 mln dozaga yaqin Pfizer vaksinasi olib kelingani to‘g‘risida xabar berilgandi.