Қорақалпоғистоннинг Мўйноқ туманида Тошкент—Нукус—Мўйноқ йўналишида авиапарвоз йўлга қўйилади. Бу ҳақда туман ҳокими Бахтияр Менглибеков «Дарё» мухбири билан суҳбатда айтиб ўтди.
Ҳокимнинг айтишича, Мўйноқ тумани ривожлантиришга қаратилган жорий йилдаги «йўл харитаси» ишлаб чиқилган.
«Бунда тадбиркорлик, қишлоқ хўжалиги, туризм, саноат соҳаларни ривожлантириш борасида режалар ўрин олган. Шунингдек, президент ҳафтада икки марта Тошкент—Нукус—Мўйноқ йўналишида авиапарвозларни йўлга қўйиш топшириғини берди. Наврўз байрами арафасида биринчи авиапарвозни амалга оширишни режа қиляпмиз. Аэропорт доимий ишласа туманда яшовчи кўпгина фуқаролар иш билан таъминланади, уларнинг бандлиги таъминланади», — дейди Бахтияр Менглибеков.
Эслатиб ўтамиз, Шавкат Мирзиёев 23—24 февраль кунлари Қорақалпоғистонга ташрифи давомида Мўйноқ туманида бўлиб, «ҳафтада икки марта Тошкент—Мўйноқ—Нукус йўналишида парвозлар бўлишини» айтган эди.
«Бу аэропорт расмга тушиш учун эмас, инсонларга хизмат қиладиган бўлиши керак», — деган эди президент.
Маълумот учун, Мўйноқ — Ўзбекистон шимоли-ғарбийда жойлашган шаҳар номидаги аэропорт бўлиб, 1947 йилда қурилган. 3-классга оид Мўйноқ аэродроми Ан-24, Як-40 ва бошқа енгил самолётларни, шунингдек, барча турдаги вертолётларни қабул қилишга қодир бўлган. 1960 йиллар бошидан 1990 йилга қадар аэродромда Ан-2 самолётлари кунига маҳаллий линиялар бўйича (асосан, Қўнғирот, Нукус, Урганч, Тахтакўприк, Қозоқдарё, Аспантай, Тулей пунктлари) 19 тагача йўловчи авиарейсларини амалга оширган. 2020 йилнинг августида Мўйноқда янги аэропорт ишга тушган эди.
Изоҳ (0)