Қашқадарёда эшак сўйиб сотаётгани айтилган ҳамда воқеа жойи тасвирланган видео тарқалди, дея хабар берди «Дарё» мухбири.
«Дарё» манбаси берган видеода икки нафар ИИБ ходими фуқаро хонадонига кириб борган. ИИБ ходимларини қарши олган аёл дастлаб эшакни ўзи сўйганини айтган бўлса, кейинчалик буни турмуш ўртоғи қилганини билдирган.
Вилоят ИИБ ахборот хизмати «Дарё» сўровига жавобан воқеа Косон туманида содир бўлганини маълум қилди.
«2022 йилнинг 10 март куни Косон туман ИИБ ходимлари томонидан туманнинг ‘Пахтазор’ МФЙда яшовчи фуқаро Б.С.нинг хонадонидаги хўжалик хоналари кўздан кечирилганида бир бош эшакни сўйиб, гўштини суякларидан ажратиб қўйгани, ҳовлисида эса яна 24 бош эшак борлиги аниқланди.
Фуқаро Б.С.нинг яшаш хонадонидаги хўжалик хонасида бўлган 1 бош эшакнинг лаҳм гўштлари тегишли тартибда вилоят ИИБ ЖТСБ Карантин тадбирларини таъминлаш бўлинмаси, туман Ветеринария ва чорвачиликни ривожлантириш бошқармаси ходимлари холислар иштирокида ҳужжатлаштириб олинган.Косон туман Ветеринария ва чорвачиликни ривожлантириш бўлими томонидан ашёвий далил сифатида олинган гўшт маҳсулотлари лабораторияда текширилганда истеъмолга яроқсиз экани маълум бўлди. Гўшт маҳсулотлари холислар иштирокида йўқ қилинди», — дейилади вилоят ИИБ ахборотида.
Мазкур ҳолат юзасидан Косон туман ИИБ томонидан суриштирув ҳаракатлари олиб борилмоқда.
Изоҳ (0)