Интерполнинг Ўзбекистондаги Миллий марказий бюроси катта миқдордаги фирибгарликда айбланган шахсни Польшадан Ўзбекистонга экстрадиция қилинганини маълум қилди.
Интерполнинг Ўзбекистон ва Польша Миллий марказий бюролари ходимларининг ҳамкорликдаги тезкор қидирув ҳаракатлари натижасида 2022 йилнинг март ойи бошларида Варшава ҳудудида асли самарқандлик бўлган 36 ёшли Ўзбекистон фуқаросининг қаердалиги аниқланиб, қўлга олинган. У Ўзбекистон ҳуқуқ-тартибот идоралари томонидан кўп миқдордаги фирибгарлик содир этгани учун Интерпол каналлари орқали қидирувга берилган бўлган.
Мазкур жиноятга алоқадор шахс Ўзбекистон фуқароларининг ишончини қозониб, АҚШда ишга жойлашиш ва виза ёрдамини олишда кўмак беришини таклиф қилиб, ўз мажбуриятларини бажармасдан туриб, улардан катта миқдорда пул олган. Фирибгарлик хизматларини тугатгандан сўнг, у мамлакатни тарк этиб, чет элда яширинган.
Шундан сўнг Самарқанд вилояти ИИБ томонидан олинган материаллар асосида Ўзбекистон Интерпол ММБ ходимлари томонидан ҳибсга олиш ва кейинчалик экстрадиция қилиш мақсадида халқаро қидирувни ташкил этиш бўйича хабарнома эълон қилинган.
Шу кунларда Ўзбекистон ва Польша Интерпол ходимларининг музокаралари ва ҳамкорликдаги тезкор ҳаракатлари туфайли қидирувдаги шахс қўлга олиниб, Ўзбекистонга топширилган.
Аввалроқ Европада катта миқдорда ўғирлик содир этган халқаро қидирувдаги шахс Ўзбекистонда қўлга олингани, 2021 йилнинг октябрида эса Сеулда Жанубий Корея Интерпол ходимлари халқаро қидирувда бўлган Ўзбекистон фуқаросини чегара постини кесиб ўтиш вақтида ушлагани тўғрисида хабар берилганди.
Изоҳ (0)