Тошкент шаҳри Чилонзор туманида 8 март куни MAN автобуси ҳайдовчиси пиёдаларни уриб юбориши оқибатида 70 ёшли киши ҳалок бўлиб, беш ёшли бола тан жароҳатлари билан шифохонага ётқизилгани хабар қилинганди. Соғлиқни сақлаш вазирлиги боланинг аҳволи ҳақида маълумот берди.
Шу куни соат 11:30 да Чилонзор кўчасида ҳайдовчи С.М. (1996 йилда туғилган) MAN автобусини бошқариб кетаётиб, тартибга солинган пиёдалар ўтиш жойида пиёдаларни уриб юборган. Оқибатда пиёда Р.З. (1952 йилда туғилган) олган тан жароҳатлари сабабли шифохонада вафот этган. Шунингдек, Р.Й. исмли фуқаро (2017 йилда туғилган) «бош соҳаси лат ейиши» ташхиси билан шифохонага ётқизилган.
Қайд этилишича, автоҳалокат сабаб шифохонага ётқизилган 5 ёшли болада жарроҳлик амалиёти муваффақиятли ўтказилган. Шундан сўнг бемор зудлик билан бош мия, бўйин, кўкрак ва бел умуртқа поғонаси, кўкрак қафаси, қорин бўшлиғи аъзолари МСКТ ҳамда қорин бўшлиғи ва кўкрак қафаси аъзолари ультратовуш текширувларидан ўтказилган.
Унга автотравма, қўшма жароҳат, бош мия ёпиқ жароҳати ва чайқалиши, қорин бўшлиғининг ёпиқ жароҳати, қора талоқ ёрилиши, кўкрак қафаси ёпиқ жароҳати, ўнг ўпканинг лат ейиши, бош энса соҳасининг эзилиб йиртилиши каби дастлабки ташхис қўйилган. Тиббий кўрсатма ва стандартларга мувофиқ, беморда зудлик билан бир неча турдаги мураккаб жарроҳлик амалиётлари бажарилган.
«Шифокорларнинг саъй-ҳаракатлари натижасида операция муваффақиятли ўтказилган. Кўрилган тезкор даво чоралари сабабли айни пайтда беморнинг умумий аҳволи яхшиланиб, унда ижобий ўзгаришлар кузатилмоқда», — дейилади хабарда.
Изоҳ (0)