Андижон шаҳар Халқ таълими бўлими Марказлашган бухгалтерия хизмати ҳисобчиси 11 ҳамда 16-сонли умумтаълим мактабларида ишламаган кишиларга сохта маълумотлар асосида жами 527 миллион сўмга яқин пулларни ҳисоблаб, маблағларни талон-торож қилгани аниқланди. Бу ҳақда «Менинг юртим» телеканалининг «Марказий студия» дастурида маълум қилинди.
Яна бир ҳолатда эса ҳисобчи ўқитувчилардан бирига туғуруқ таътили учун 13,5 миллион сўмдан кўпроқ пулларни тушириб, «6,5 миллион сўм ортиқча тўлаб берганим учун 3,5 миллионини қайтаринг» мазмунида гап айтган. Бундан ташқари, у ушбу ўқитувчига ишламаган вақтида 800 минг аванс ҳам ўтказиб берганини таъкидлаб, жами 4,3 миллион сўм беришини талаб қилган.
Ҳисобчи пулларни олаётган вақтида ушланган. Жиноят ишлари бўйича Марҳамат туман суди ҳисобчи Обидовани 2 йил муддатга муайян ҳуқуқдан маҳрум қилиб, 2 йил ахлоқ тузатиш ишлари жазосини тайинлаган.
Шунингдек, Сурхондарё вилояти перинатал маркази бош ҳисобчиси лавозимида 2015 йилдан буён ишлаб келган Т.А. ҳисобчи ва ғазначи билан тил бириктирган ҳолда, марказда меҳнат шартномаси бекор қилинган кишиларнинг рўйхатини тузиб чиққан. Уларнинг номига пластик карталар очилиб, иш ҳақи ва унга тенглаштирилган тўловлардан жами 772 миллион сўм ўтказилган. Кейинги ҳолатда эса салкам 92 миллион сўм рабғат пуллари ҳақида ҳужжат сохталаштириб, 13 миллион сўм хизмат сафари учун дея яна 92 миллион сўмни ўзлаштириб олган.
Суд ҳукмига кўра бош ҳисобчи 5 йил 6 ойга озодликдан маҳрум этилган, унинг шерикларидан бирига 5 йил 1 ой, ғазначига эса ойлик иш ҳақининг 20 фоизини давлат ҳисобига ушлаб қолган ҳолда 2 йил муддатга ахлоқ тузатиш ишлари жазоси тайинланган.
Аввалроқ Тошкентда ўзи ишлайдиган корхонанинг 160 млн сўмдан ортиқ маблағини талон-торож қилган бош ҳисобчи ушлангани, Сирдарё ва Сурхондарёда жами 4 млрд сўм кредит маблағларини талон-торож қилган раҳбарлар қўлга олингани тўғрисида хабар берилганди.
Изоҳ (0)