Ўзбекистон Жиноят кодексининг иккита моддаси банк карталаридан пул маблағларини ўғирлашни оғирлаштирувчи ҳолат сифатида жавобгарликни белгиловчи норма билан тўлдирилмоқда. Бу ҳақда Олий Мажлис Қонунчилик палатаси матбуот хизмати хабар берди.
Бугунги кунда банк пластик карточкаларидан пул маблағларини ўғирлик йўли билан талон-торож қилиш ҳолатлари Жиноят кодексининг 169-моддаси (ўғрилик) билан малакаланади.
Таъкидланишича, кўп ҳолларда фуқароларнинг банк пластик карточкаларидан оз миқдорда талон-торож қилинаётгани сабабли ушбу қилмишга Жиноят кодекси 169-моддасининг 1-қисми билан айб эълон қилинади. Бу ўз навбатида, айбдор шахсларга нисбатан етарлича жазо чораларининг қўлланилмаётганига, уларнинг ахлоқан тузалиш йўлига ўтмаётганига, такроран жиноий фаолият билан шуғулланишига олиб келмоқда.
Шу жиҳатдан, бу каби қилмишлар учун Жиноят кодексининг 168 ва 169-моддаларини оғирлаштирувчи ҳолат сифатида жавобгарликни белгиловчи норма билан тўлдириш таклиф қилинмоқда.
«Қонун лойиҳасининг қабул қилиниши келгусида жисмоний ва юридик шахсларнинг электрон пул маблағларини яширин равишда талон-торож қилиш, фуқароларнинг ишончига кириб унинг ҳисоб рақами ёки пластик картасидаги пул маблағларини ўғирлаш ҳолатларининг олдини олишга хизмат қилади», — дейилади хабарда.
Маълумот учун, жазони оғирлаштирувчи ҳолатлар — содир этилган жиноятнинг ва жиноят содир этган шахснинг ижтимоий хавфлилик даражасини оширувчи ҳамда оғирроқ жазо тайинлашга асос бўладиган ҳолатлардир.
Аввалроқ Фарғонада банкнинг мобил иловасидаги техник хатоликдан фойдаланиб, қарийб 700 млн сўм пулни ўғирлаган шахслар ушлангани, Бухорода оғир касал эканини айтиб, фуқаро ишончига кирган ва унинг пластик карточкасидан салкам 1 млн сўм ечиб олган қизга жиноят иши очилгани тўғрисида хабар берилганди.
Изоҳ (0)