Toshkent shahri Chilonzor tumanida 8-mart kuni MAN avtobusi haydovchisi piyodalarni urib yuborishi oqibatida 70 yoshli kishi halok bo‘lib, besh yoshli bola tan jarohatlari bilan shifoxonaga yotqizilgani xabar qilingandi. Sog‘liqni saqlash vazirligi bolaning ahvoli haqida ma’lumot berdi.
Shu kuni soat 11:30 da Chilonzor ko‘chasida haydovchi S.M. (1996-yilda tug‘ilgan) MAN avtobusini boshqarib ketayotib, tartibga solingan piyodalar o‘tish joyida piyodalarni urib yuborgan. Oqibatda piyoda R.Z. (1952-yilda tug‘ilgan) olgan tan jarohatlari sababli shifoxonada vafot etgan. Shuningdek, R.Y. ismli fuqaro (2017-yilda tug‘ilgan) “bosh sohasi lat yeyishi” tashxisi bilan shifoxonaga yotqizilgan.
Qayd etilishicha, avtohalokat sabab shifoxonaga yotqizilgan 5 yoshli bolada jarrohlik amaliyoti muvaffaqiyatli o‘tkazilgan. Shundan so‘ng bemor zudlik bilan bosh miya, bo‘yin, ko‘krak va bel umurtqa pog‘onasi, ko‘krak qafasi, qorin bo‘shlig‘i a’zolari MSKT hamda qorin bo‘shlig‘i va ko‘krak qafasi a’zolari ultratovush tekshiruvlaridan o‘tkazilgan.
Unga avtotravma, qo‘shma jarohat, bosh miya yopiq jarohati va chayqalishi, qorin bo‘shlig‘ining yopiq jarohati, qora taloq yorilishi, ko‘krak qafasi yopiq jarohati, o‘ng o‘pkaning lat yeyishi, bosh ensa sohasining ezilib yirtilishi kabi dastlabki tashxis qo‘yilgan. Tibbiy ko‘rsatma va standartlarga muvofiq, bemorda zudlik bilan bir necha turdagi murakkab jarrohlik amaliyotlari bajarilgan.
“Shifokorlarning sa’y-harakatlari natijasida operatsiya muvaffaqiyatli o‘tkazilgan. Ko‘rilgan tezkor davo choralari sababli ayni paytda bemorning umumiy ahvoli yaxshilanib, unda ijobiy o‘zgarishlar kuzatilmoqda”, — deyiladi xabarda.
Izoh (0)