«Ўғли отасига ёрдам бермоқчи бўлган ва у ҳам 20 фоиз куйган». Қашқадарёда яшин уриш ҳолати юзасидан қўшимча маълумот берилди

Қашқадарё вилояти Деҳқонобод тумани «Откамар» МФЙда 9 март куни соат 11:45 да ноқулай об-ҳаво шароити натижасида 3 нафар фуқарони яшин ургани хабар қилинганди. «Дарё" мухбири билан суҳбатлашган туман Фавқулодда вазиятлар бўлими ходими Ўткирбек Йўлдошевнинг маълумот беришича, чақмоқ уриши оқибатида вафот этган ва жароҳат олганлар бир оила вакиллари ҳисобланади.

«Ота икки ўғли билан яшаш хонадонидан 800 метр узоқликда яшовчи катта ўғлини кўриш мақсадида йўлга чиққан бўлган. Йўлда кетишаётганда отани яшин урган ва йиқитган. Ерда ётган отани яшин уришда давом этаётганда ўғли (1985 йилда туғилган) отасига ёрдам беришга уринган. Яшин ёрдамга келган ўғилга ҳам зарар бериб, унинг 20-25 фоиз куйишига сабаб бўлган. Бошқа бир ўғил (1980 йилда туғилган) эса кўз ўнгида бўлаётган воқеалар сабаб шокка тушган», — дейди Ўткирбек Йўлдошев.

Куйиш жароҳатини олган ўғил Деҳқонобод туман тиббиёт бирлашмасининг жонлантириш бўлимига ётқизилган. Иккинчи ўғилга эса тиббий ёрдам кўрсатилиб, уйига жавоб берилган.

Эслатиб ўтамиз, яшин уриши оқибатида вафот этган эркак 63 ёшда бўлган. Ҳозирда ҳолат юзасидан суриштирув ишлари олиб борилмоқда.